“Kelajakka qaytib” ixlosmandlari uchun DeLorean Alpha5 taqdim etildi (foto)

DeLorean kompaniyasi elektromotorga ega to‘rt o‘rindiqli fastbek — Alpha5 avtomobilini taqdim etdi, deb xabar beradi Motor1.

Elektromobilning tashqi ko‘rinishini DeLorean dizaynerlari original DMC-12 uchun javobgar bo‘lgan Italdesign atelyesi mutaxassislari bilan hamkorlikda yaratgan. “Kelajakka qaytib” filmida suratga tushgan avtomobildagi kabi yangi modelning eshiklari yuqoriga qarab ochiladi.

Muhandislar avtomobilning aerodinamik qarshilik koeffitsiyentini 0,23 ga qadar tushirishga muvaffaq bo‘lgan. Bu elektromobilga soatiga 100 kilometr tezlikka 3,4 soniyada erishish hamda energiyani tejash imkonini beradi. Mashinaning maksimal tezligi — 241 kilometr/soat. Ishlab chiqaruvchining ma’lum qilishicha, Alpha5 bir marta quvvatlanish orqali 483 kilometr yo‘l bosa oladi.

Avtomobil saloniga to‘rtta alohida o‘rindiq, to‘liq raqamli qurilmalar paneli, shuningdek, axborot-ko‘ngilochar tizim uchun displey o‘rnatilgan.

DeLorean Alpha5 cheklangan — 88 nusxada sotuvga chiqadi. Uning narxi hozircha oshkor etilmagan.

Keyinroq DeLorean model qatorida benzinda ishlovchi V8 dvigatelli kupe, elektrosedan va katta hajmli elektrokrossover paydo bo‘lishi kutilmoqda. Bundan tashqari, 1980-yillardagi original DMC-12 bazasida restomod taqdim etilishi rejalashtirilgan.

Eslatib o‘tamiz, 2020-yilda Estoniyadagi kiyim do‘konida “Kelajakka qaytib” filmidagi DeLorean avtomobili sotilgan edi.