Davlat rahbarining hamda hukumat qarorlariga muvofiq Investitsiyalar va tashqi savdo vazirligining bir qator tarkibiy bo‘linmalari rahbarlari yangi lavozimlarga tayinlandi. Bu haqda vazirlik matbuot xizmati xabar berdi.
Xususan, Investitsiyalar va tashqi savdo vazirligi Ijtimoiy soha va farmatsevtika sanoati boshqarmasi boshlig‘i Ulug‘bek Egamov Farmatsevtika sanoatini rivojlantirish agentligi direktorining birinchi o‘rinbosari etib tayinlandi.
Yengil va elektr sanoati boshqarmasi boshlig‘i Mirmuhsin Sultonov “O‘ztekstilsanoat” uyushmasi raisining birinchi o‘rinbosari etib tayinlandi.
Mirmuhsin Sultonov tayinlovga qadar Moliya vazirligi, Investitsiyalar va tashqi savdo vazirligi boshqarma boshlig‘i lavozimlarida ishlab kelgan.
Geologiya, tog‘-kon sanoati, metallurgiya, mashinasozlik va qurilish materiallari boshqarmasi boshlig‘i o‘rinbosari Bunyod Egamberdiyev O‘zbekistonning Indoneziyadagi elchixonasining savdo-iqtisodiy va turizm masalalari bo‘yicha maslahatchisi etib tayinlandi.
Xitoy bilan hamkorlik qilish bosh boshqarmasi boshlig‘i Shohjahon Jumayev O‘zbekiston Tashqi iqtisodiy faoliyat milliy banki boshqaruvi raisining o‘rinbosari etib tayinlandi.
1-iyun kuni bosh vazir o‘rinbosari — investitsiyalar va tashqi savdo vaziri Sardor Umurzoqov vazirlik jamoasi bilan bo‘lib o‘tgan uchrashuv chog‘ida yuqoridagi rahbarlarning yangi lavozimlarga tayinlanganlari bilan samimiy tabriklab, keyingi kasbiy faoliyatlarida muvaffaqiyatlar tilagan.
Avvalroq Madaniy meros agentligi direktori lavozimidan ozod qilingani, “O‘zbekkonsert”ga yangi direktor tayinlangani, To‘lqin Abdusattorov adliya vazirining o‘rinbosari lavozimiga tayinlangani to‘g‘risida xabar berilgandi.
Izoh (0)