Toshkentlik erkak do‘koni oldida noqonuniy valyuta sotish bilan shug‘ullanib kelgan shaxslar ustidan IIVga shikoyat qildi. Bu haqda IIV Transport va turizm obyektlarida xavfsizlikni ta’minlash departamenti xabar berdi.
“25-may kuni fuqaro SH.N. ariza bilan murojaat qilib, Toshkent shahar Olmazor tumanida joylashgan savdo do‘koni oldida ikki nafar notanish shaxs noqonuniy valyuta oldi-sotdisi bilan shug‘ullanayotganini aytib, ularga nisbatan qonuniy chora ko‘rishni so‘rab, murojaat qildi”, — deyiladi xabarda.
Arizaga asosan olib borilgan tezkor tadbir davomida Shayxontohur tumani Jarariq ko‘chasida joylashgan “Bilol go‘sht market” MCHJ ichida Yakkasaroy tumanida yashovchi I.A. (22 yosh) noqonuniy tarzda 3,6 ming dollarni ariza egasi SH.N.ga 40 million so‘mga almashtirib berayotgan vaqtida ushlangan.
Holat yuzasidan tergovga qadar surishtiruv harakatlari olib borilmoqda.
Avvalroq Toshkent, Andijon va Qashqadaryo viloyatlarida noqonuniy valyuta ayirboshlash holatlariga chek qo‘yilgani, Xorazm va Qashqadaryoda jami 5,2 ming dollarni noqonuniy sotishga uringan valyutafurushlar ushlangani to‘g‘risida xabar berilgandi.
Izoh (0)