Avstraliyaning yangi hukumatida ayol vazirlar rekord darajada ko‘p o‘rin egalladi

1-iyun kuni Kanberrada Avstraliyaning yangi hukumati ishga kirishdi, uning tarkibiga rekord darajada ko‘p — 13 nafar ayol vazir kirdi, deb xabar bermoqda Associated Press. Bu 30 ta vazirlik lavozimining deyarli yarmiga teng. Vazirlar Mahkamasiga ham rekord miqdordagi xotin-qizlar kirgan: ular 23 o‘rindan 10 tasini egallagan.

11 kun oldin bosh vazir etib saylangan Entoni Albaniz “Avstraliyaning o‘zi kabi xilma-xil bo‘lgan bunday inklyuziv hukumatni boshqarishdan juda faxrlanaman” dedi. Ann Ali vazir lavozimini egallagan birinchi musulmon ayol bo‘ldi — u Yoshlar ishlari vazirligini boshqargan. Avstraliyaning tub aholi vakili Linda Byorni Tubjoy xalqlar ishlari vazirligini o‘z qo‘liga oldi. Penni Vong tashqi ishlar kotibi, Kler O’Nil ichki ishlar kotibi, Keti Gallager esa g‘aznachilik kotibi bo‘ldi.

Yil boshidan beri dunyoning  hukumati yangilangan boshqa mamlakatlarida ham ayol vazirlarning ulushi ortgan. Masalan, Niderlandiyada hozirda 29 ta vazirlik lavozimidan 14 tasini ayollar egallab turibdi, shulardan 10 tasi Vazirlar Mahkamasida. Chili Vazirlar Mahkamasidagi 24 a’zodan 14 nafari ayol vazirdir.

Iqtisodiy hamkorlik va taraqqiyot tashkiloti ma’lumotlariga ko‘ra, 2021-yil uchun vazirliklarni boshqarayotgan ayollarning eng yuqori ulushi quyidagi davlatlarga to‘g‘ri kelmoqda:

• Kosta-Rika (52 foiz);
• Avstriya (57,1 foiz);
• Belgiya (57,1 foiz);
• Shvetsiya (57,1 foiz).

Jahon banki ma’lumotlariga ko‘ra, 2021-yil yakuniga ko‘ra ayol vazirlarning dunyo bo‘yicha o‘rtacha ulushi 21,97 foizni tashkil qilgan.