АҚШ ўзи ёки иттифоқчилари ҳужумга учрамагунча Украинадаги можарога тўғридан-тўғри киришмоқчи эмас. Бу ҳақда АҚШ президенти Жо Байден The New York Times газетасига ёзган мақоласида таъкидлаган.
Байден Украинадаги жанглар тўрт ойдан бери давом этаётганига эътибор қаратди ва бундай шароитда АҚШнинг мақсадларини аниқ белгилаш зарур, деб таъкидлади. «Американинг мақсади оддий: биз демократлашган, мустақил, суверен ва гуллаб-яшнаган Украинани кўришни, уни кейинги тажовузлардан ҳимоя қилиш воситаларига эга бўлишини истаймиз», — деди у.
Байден АҚШ нималар қилиши ва нималар қилмаслигини ҳам санаб ўтди. Унинг сўзларига кўра, Вашингтон қуйидагиларни амалга оширади:
- Киевни «Украинадаги жанг майдонларидаги асосий нишонларга аниқроқ зарбалар йўллаш» имконини берадиган замонавий ракета тизимлари ва ўқ-дорилар билан таъминлаш;
- замонавий қурол-яроғлар, жумладан, Javelin танкка қарши ракеталари, Stinger зенит ракеталари, артиллерия ва юқори аниқликдаги ракета тизимлари, радарлар, учувчисиз учар аппаратлар, Ми-17 вертолётларини етказиб беришни давом эттириш;
- Киевга молиявий ёрдам кўрсатишни давом эттириш;
- иттифоқчилар ва шериклар билан Россияга қарши санкциялар масаласида ҳамкорлик қилиш;
- глобал озиқ-овқат инқирозини бартараф этиш бўйича иш олиб бориш;
- Европа иттифоқчилари ва бошқа мамлакатларга Россиянинг ёқилғисига қарамлигини камайтиришга ёрдам бериш;
- НАТОнинг шарқий қанотини мустаҳкамлаш.
- Россияда режимни ўзгартиришга уриниш;
- Украинада жанг қилиш ёки рус қўшинларига ҳужум қилиш учун америкалик аскарларни юбориш;
- Украинани ўз чегараларидан ташқарига зарба беришга ундаш;
- Украинанинг Россияга «ҳар қандай ҳудудий ён бериши» учун босим ўтказиш.
АҚШ президенти ўз мақоласида, дунёда кўпчилик ядро қуролидан фойдаланиш эҳтимолидан хавотирда эканини таъкидлади. Унинг сўзларига кўра, Вашингтон Россиянинг ядродан фойдаланиш ниятидан далолат берувчи белгиларни кўрмаяпти.
Россиянинг Украинага босқини бошланганидан бери Ғарб давлатлари ва НАТО Киевга бир неча бор қурол-яроғ етказиб берган, бироқ айни пайтда улар Москванинг реакциясидан қўрқиб, оғир техникаларни жўнатишдан тийилмоқда.
31 май куни АҚШ президенти Жо Байден Вашингтон Киевга Россия ҳудудига етиб бора оладиган ракета комплексларини бермаслигини айтган эди. The New York Times’га ёзган мақоласида у Киевга «жанг майдонидаги асосий нишонларга аниқроқ зарба йўллаш» имконини берадиган илғор ракета тизимлари ва ўқ-дорилар етказиб берилишини эълон қилди.
Изоҳ (0)