Германия собиқ президенти (2012—2017 йилларда) Йоахим Гаук Украинанинг мудофаа салоҳиятини кучайтириш учун ҳозир унга қурол етказиб бериш зарур, деб ҳисоблайди.
«Жаҳон урушида қатнашган иттифоқчиларнинг қуроллари бўлмаганида, Европа ҳозир нацистлар ҳукмронлиги остида бўларди. Аммо бу тарихий мисолсиз ҳам биз ҳозирги вазиятда биринчи навбатда сўзни Украинага беришимиз кераклиги кундек равшан», — деди Гаук Билд газетасига берган интервьюсида.
«Агар одамлар бизга ‘Эркинлигимиз учун курашмоқчимиз, ҳатто ҳаётимизни хавф остига қўямиз’, деса, хавфсиз жойда туриб олиб уларга нима тўғрилигини тушунтириш бизнинг ишимиз эмас», — деди Гаук ва бу «бефарқлик ҳамда такаббурликнинг энг юқори даражаси» бўлишини қўшмча қилди.
Шу билан бирга, Гаук сиёсатчилар Россия президенти Владимир Путин билан музокараларни давом эттириши кераклигини таъкидлади. «Биз дипломатиядан ҳеч қачон воз кечмаслигимиз керак. Бироқ музокаралар ўзига ишонч, шунингдек, куч позициясидан олиб борилиши зарур», — деди Германиянинг собиқ президенти. «Совуқ уруш даврида бу тўғри ечим бўлган», — дея сўзини якунлади у.
Аввалроқ Билд газетаси Германия ҳукумати ва Германия федерал канцлери идораси Украинага Мардер пиёдаларга мўлжалланган жанговар машиналарини етказиб беришга тўсқинлик қилаётгани ҳақида хабар берганди. Нашр маълумотларига кўра, асосий аҳамиятга эга вазирларни ўз ичига олган Федерал хавфсизлик кенгаши бир ойдан бери Рҳеинметалл концерни томонидан ишлаб чиқарилган 100 тагача «Мардер»ни экспорт қилиш бўйича қарор қабул қилмаяпти. Рҳеинметаллънинг Украинага қурол юбориш тўғрисидаги аризаси 22 апрелдан бери кўриб чиқилмоқда. Берлин Украинага ваъда қилган Гепард ўзиюрар зенит қуролларини Киевга етказиб бериш Германия томони ҳалигача улар учун мос миқдордаги снарядларни харид қила олмагани сабабли тўхтаган, деб хабар берганди Die Welt нашри Украина ҳукуматидаги манбаларга таяниб.
Россия 24 февралдан бери Украинада «ҳарбий махсус операция» ўтказмоқда. Ғарб давлатлари, жумладан, АҚШ ва Буюк Британия Киевга қурол етказиб беришни бошлаган.
Февраль ойида Германия канцлери Олаф Шольц мамлакат Украинага қурол етказиб бермаслигини айтганди. Апрель бошида эса Рҳеинметалл концерни Украинага 50 та «Леопард 1» эски танкларини етказиб беришга қарор қилган. 27 апрель куни эса Германия биринчи марта Украинага оғир қуроллар етказиб бериши ҳақида эълон қилинди.
Изоҳ (0)