O‘zbekistonning barcha tuman-shaharlarida 1-sentabrdan “Namunali maktab” reytingi joriy etiladi

2022-yilning 1-sentabrdan boshlab O‘zbekistonning barcha tuman (shahar)lari kesimida “Namunali maktab” reytingini shakllantiriladi va e’lon qilib boriladi. Bu haqda Xalq ta’limi vazirligi matbuot xizmati ma’lum qildi.

“Xalq ta’limini rivojlantirishga oid qo‘shimcha chora-tadbirlar to‘g‘risidagi” prezident qaroriga ko‘ra, reyting doirasida har o‘quv yili yakunida umumiy o‘rta ta’lim muassasalarida olib borilayotgan ma’naviy-ma’rifiy ishlar holati Xalq ta’limi vazirligi tomonidan tasdiqlangan mezonlar bo‘yicha baholab boriladi.

Buning uchun umumiy o‘rta ta’lim muassasalarida olib borilayotgan ma’naviy-ma’rifiy ishlar holatini baholash va reytingni yuritish uchun tuman (shahar) xalq ta’limi bo‘limlari boshliqlari rahbarligida maxsus komissiyalar tuziladi hamda ularning xulosalariga ko‘ra, umumiy o‘rta ta’lim muassasalari reyting ko‘rsatkichlari asosida “yashil”, “sariq” va “qizil” toifalarga ajratiladi.

Reyting ko‘rsatkichlari asosida “qizil” toifaga kiritilgan umumiy o‘rta ta’lim muassasalarida ma’naviy-ma’rifiy ishlar samaradorligini oshirish bo‘yicha zarur choralar ko‘riladi.

Eslatib o‘tamiz, 2021-yilning noyabrida Vazirlar Mahkamasi huzuridagi Ta’lim sifatini nazorat qilish davlat inspeksiyasida tashkil etilgan matbuot anjumanida respublikada eng yuqori natija ko‘rsatgan ixtisoslashtirilgan va umumiy o‘rta ta’lim maktablari nomi ma’lum qilingandi.