Bugun,

  • USD 11095.31
  • RUB 173.84
  • EUR 10772.44

Ijtimoiy tarmoqlarda Toshkent shahri Mirobod tumani, Abdurauf Fitrat ko‘chasida joylashgan 4 qavatli 33/2 uyining yerto‘lasida mehribonlik uylari bitiruvchilari uchun uy-joylar ajratilayotgani aytilgan xabarlar tarqaldi. Milliy gvardiya axborot xizmatiga ko‘ra, tuman hokimining o‘rinbosari ushbu xonadonlar mehribonlik uylari tarbiyalanuvchilari uchun mo‘ljallanmaganini ma’lum qilgan.

O‘zbekiston prezidentining 2021-yil 9-avgustdagi “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida” gi farmoniga muvofiq uy-joy bilan ta’minlanmagan o‘quv-tarbiya muassasalari o‘quvchilariga, yetim bolalar va ota-ona qaramog‘idan mahrum bo‘lgan bolalar uchun Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari shahar va tumanlarda qurilgan ko‘p qavatli turar joy binolarida birlamchi ko‘chmas mulk bozorida xonadonlar sotib olinadi.

Mirobod tumani hokimining arxitektura, kapital qurilish va kommunikatsiyalarni rivojlantirish bo‘yicha o‘rinbosari Farhod Najmiddinov ijtimoiy tarmoqlarda tarqalgan xabarlarga munosabat bildirib, ushbu xonadonlar mehribonlik uylari tarbiyalanuvchilari uchun emasligini bildirgan.

“Birinchidan, bu yerto‘la emas, balki derazalari deyarli 2x2 metrgacha bo‘lgan quyi qavat. Ikkinchidan, mazkur manzildagi uylar haqiqatan ham turar joy binolariga aylantirilmoqda. Ammo ushbu xonadonlar mehribonlik uylari bitiruvchilari uchun mo‘ljallanmagan, chunki yangi turar joy binolaridan mehribonlik uylari bolalari uchun xonadonlar ajratilishi yuzasidan prezident farmoni mavjud. Komissiya qaroriga asosan 33/2 ko‘p qavatli uyning yangilangan quyi qavatidan kimga xonadon ajratilishi aniqlanadi. Lekin yana takror aytaman, bu xonadonlar mehribonlik uylarining bitiruvchilari uchun emas”, — degan Najmiddinov.

Eslatib o‘tamiz, prezident 9-avgustdagi qarori bilan mehribonlik uylari (16 ta, 1 541 nafar bola), bolalar shaharchalari (4 ta, 236 nafar bola), oilaviy bolalar uylari (5 ta, 46 nafar bola) va Sog‘liqni saqlash vazirligi tizimining bolalar uylari (13 ta, 506 nafar bola) Milliy gvardiyaga biriktirilgan edi.

Izoh
Asosiy yangiliklar
Mahalliy
Virtual kartalar nima va ulardan qanday qilib to‘g‘ri foydalanish mumkin?
Dunyo
Twitter ofisida xodimlar uchun karavotlar paydo bo‘ldi, Ilon Mask avvalroq me’yoridan ortiqcha ish bo‘lishi haqida ogohlantirgandi
Mahalliy
Xorazmda ikki kishi is gazidan vafot etdi