inDriver taksi xizmati o‘z xodimlarining bir qismini Rossiyadan Qozog‘istonga ko‘chirdi

Rossiyaning inDriver taksi xizmati o‘z xodimlarining bir qismini Qozog‘istonga ko‘chirdi. Bu haqda Forbes xabar berdi.

2-may kuni inDriver asoschisi va bosh direktori Arsen Tomskiy Facebook’da kompaniyaning asosiy biznesida Rossiyaning ulushi kichik ekanini va u ham pasayishda davom etayotganini yozgan. Unga ko‘ra, jamoa endilikda xalqaro miqyosda faoliyat yuritadi.

Hozir Qozog‘istonda 130 ga yaqin inDriver xodimi bor – ularning bir qismi Nur-Sultonda, lekin asosiy jamoa Olmaotada.

Qozog‘iston mintaqadagi eng maqbul va barqaror joy, — deb yozadi Tomskiy.

Uning qo‘shimcha qilishicha, Qozog‘istondagi ofis besh yil avval ochilgan inDriver kompaniyasining birinchi xorijiy vakolatxonasi bo‘lgan. Tomskiy xodimlarni boshqa joyga ko‘chirish uchun nima uchun Qozog‘istonni tanlaganini ham tushuntirdi:

Qozog‘istonda rus tili millatlararo muloqot tili, mamlakatda IT-kompaniyalarni qo‘llab-quvvatlash bo‘yicha dasturlar, tezda rivojlanayotgan barqaror iqtisodiyot mavjud, Olmaota esa issiq va go‘zal shahar, — deydi u.

inDriver 2016-yilda O‘zbekistonda internet agregatori sifatida o‘z faoliyatini boshlagan. 2018-yildan boshlab esa taksi xizmati sifatida ishlab kelmoqda.

So‘nggi oylarda Rossiyadan O‘zbekistonga ham bir qancha kompaniyalar ko‘chib kelmoqda.

Jumladan, avvalroq EPAM IT kompaniyasi yuzlab xodimlarini Toshkentga ko‘chirgani haqida xabar berilgan edi.