“Ko‘kdala va Chiroqchi tumanlarida har biri kamida 500 mVt quvvatga ega 2 ta quyosh fotoelektr stansiyasini qurish bo‘yicha loyihalarni amalga oshirishni boshlash zarur” — prezident

Shavkat Mirziyoyev ishtirokida Qarshi shahrida xalq deputatlari viloyat kengashining navbatdan tashqari sessiyasi bo‘lib o‘tmoqda, deb xabar berdi “Daryo” muxbiri.

Prezidentning aytishicha, viloyat ulkan sanoat salohiyatiga ega bo‘lsa-da, bugungi kunda yalpi hududiy mahsulotda sanoat ulushi atigi 18 foizni tashkil etadi.

Shuni hisobga olib, 2022—2023-yillarda amalga oshiriladigan, umumiy qiymati 14,7 trillion so‘m bo‘lgan 270 ta sanoat loyihalari dasturi shakllantirilgan. Bundan tashqari, davlat ahamiyatidagi 7 ta yirik loyiha amalga oshirilmoqda.

Mas’ullarga Tallimarjon issiqlik elektr stansiyasida qiymati 829 million dollar bo‘lgan, qo‘shimcha 900 mVt quvvatlarni ishga tushirish loyihasini hamda G‘uzorda qiymati 240 million dollar va quvvati 300 mVt bo‘lgan, quyosh elektr stansiyasini barpo etish loyihasini 2022-yil yakunigacha boshlash bo‘yicha topshiriq berildi.

Shuningdek, Ko‘kdala va Chiroqchi tumanlarida har biri kamida 500 mVt quvvatga ega 2 ta quyosh fotoelektr stansiyasini qurish bo‘yicha loyihalarni amalga oshirishni boshlash zarurligi ta’kidlandi.

“Investitsiyalar va tashqi savdo vazirligi qurilish materiallarini ishlab chiqarish bo‘yicha umumiy qiymati 235 million dollar bo‘lgan 70 ta loyihani 2022-yil yakunigacha ishga tushirishga shaxsan javob beradi. Jumladan, Dehqonobod va Qamashida tashkil etilgan qurilish materiallari klasterini 1-dekabrga qadar to‘liq ishga tushirish zarur”, — deydi prezident.

Bundan tashqari, Kitob tumanidagi “Qarshi konch sement” korxonasida 150 million dollar xorijiy investitsiya hisobidan, yiliga 1,2 million tonna sement ishlab chiqarish zavodini shu yil iyuldan kechiktirmay ishga tushirish kerakligi aytildi. Ushbu yangi zavodga 15 kilometrlik temiryo‘l tortiladi.