Shavkat Mirziyoyev ishtirokida Qarshi shahrida xalq deputatlari viloyat kengashining navbatdan tashqari sessiyasi bo‘lib o‘tmoqda, deb xabar berdi “Daryo” muxbiri.
Davlat rahbarining ta’kidlashicha, Infratuzilma dasturi doirasida va qo‘shimcha ajratilgan 62 milliard so‘m hisobidan, 4,5 mingta sinfxonani 66 mingta parta va 5 mingta doska bilan ta’minlash choralari ko‘riladi.
Mas’ullarga qo‘shimcha ajratilgan 337 milliard so‘m hisobidan, ichimlik suv ta’minoti va kanalizatsiya tizimini yaxshilash bo‘yicha loyihalarni bir hafta muddatda boshlashi kerakligi topshirildi.
“Shuningdek, 2022-yilda qo‘shimcha ajratilayotgan 125 milliard so‘m hisobidan, Koson, Nishon va Kasbi tumanlaridagi 150 kilometr yaroqsiz lotoklarni almashtirishni ta’minlashi hamda yangi texnologiyalarni qo‘llashi lozim. Bundan tashqari 354 milliard so‘m evaziga, yo‘llar va ko‘priklarni ta’mirlash ishlarini sifatli amalga oshirishi lozim”, — deydi davlat rahbari.
Mutasaddilarga, shuningdek, qo‘shimcha ajratilgan 93 milliard so‘m hisobidan, tibbiyot, sport obyektlarini ta’mirlash va rekonstruksiya qilish, obodonlashtirish ishlarini ta’minlashi kerakligi aytildi.
Urgut erkin iqtisodiy zonasi filiali hududi orqali, 15 kilometr temir yo‘l qurishi zarurligi, bunga byudjetdan 50 milliard so‘m berilishi ta’kidlandi.
Bundan tashqari Qashqadaryoda ijtimoiy soha va infratuzilmani yaxshilash bo‘yicha alohida Ishchi guruhi tuziladi. Ishchi guruhi har haftada 4 kun Qashqadaryoda bo‘lib, ishlarni samarali tashkil etadi, markazlashgan va qo‘shimcha mablag‘larning manzilli hamda maqsadli ishlatilishini nazorat qiladi.
Izoh (0)