Shavkat Mirziyoyev ishtirokida Qarshi shahrida xalq deputatlari viloyat kengashining navbatdan tashqari sessiyasi bo‘lib o‘tmoqda, deb xabar berdi “Daryo” muxbiri.
Prezidentni ta’kidlashicha, 2022-yilda Qashqadaryoga 1,5 trillion so‘mdan ziyod mablag‘lar ajratilib, jami 2 800 kilometr muhandislik-kommunikatsiya tarmoqlari, 160 ta ijtimoiy soha obyektlarini yangidan qurish va rekonstruksiya qilish ishlari olib borilmoqda.
Shavkat Mirziyoyev 2022-yilda Qashqadaryoda ijtimoiy soha va infratuzilma bilan bog‘liq eng dolzarb muammolarni hal etish uchun respublika byudjetidan qo‘shimcha 360 milliard so‘m ajratilishini ma’lum qildi.
Shuningdek, Investitsiya vazirligi bu ishlar uchun xalqaro moliya institutlari mablag‘laridan 100 million dollar imtiyozli mablag‘lar yo‘naltiradi.
“Ushbu qo‘shimcha ajratilayotgan 360 milliard so‘m va 100 million dollar hisobiga, ahvoli eng og‘ir bo‘lgan obyektlarda bajariladigan ishlarning dastlabki manzilli ro‘yxati shakllantirildi. Bu ishlarni jadal boshlash uchun dushanba kuni, Moliya vazirligi 100 milliard so‘m ssuda, hamda Investitsiyalar vazirligi 100 milliard so‘m mablag‘ni ajratsin”, — deydi prezident.
Izoh (0)