Shavkat Mirziyoyev Qashqadaryoda Abdulla Oripov nomi bilan bog‘liq tanlov uyushtirish kerakligini aytdi. Bu haqda Shavkat Mirziyoyev Qarshi shahrida bo‘lib o‘tayotgan xalq deputatlari viloyat kengashining navbatdan tashqari sessiyasida ta’kidladi, deb xabar bermoqda “Daryo” muxbiri.
Davlat rahbariga sessiya davomida Koson tumani faollari tomonidan Abdulla Oripov nomi bilan bog‘liq tanlov uyushtirish taklifi bildirildi. Shavkat Mirziyoyev bu taklif o‘ziga ma’qul kelganini, shuningdek, bu tanlovni avval Qashqadaryoda, keyin butun respublika bo‘yicha namuna qilishni ta’kidladi.
“Shu bilan birga, alohida topshirig‘im ham bor. Kinochilarimiz Abdulla Oripov hayoti va ijodiga oid alohida bir film ishlasin. Abdulla Oripov haqida kino ishlasak arziydi, albatta! Men u insonni yaxshi tanirdim, ko‘p hamsuhbat bo‘lganman. Bitta she’r yozish uchun o‘nta kitob o‘qirdilar”, — deydi prezident.
Davlat rahbari Abdulla Oripovning “Kolumbda bor alamim manim, O‘zbekiston — Vatanim manim!” degan satrini eslab o‘tdi.
“Film samimiy bo‘lsin. Abdulla akaning Toshkentga borgani, qiyinchiliklar ko‘rgani, shunga qaramay, ijodidan chekinmagani ko‘rsatib berilishi kerak”, — dedi prezident.
Shavkat Mirziyoyev mutasaddilarga bir yilgacha muddatda shu filmni ishlab, taqdim qilish zarurligini aytdi.
Mavzuga doir:
- “2022-yilda Qashqadaryoda ijtimoiy soha va infratuzilma bilan bog‘liq muammolarni hal etish uchun 360 milliard so‘m ajratiladi” — prezident
- “Qashqadaryoda ijtimoiy soha va infratuzilmani yaxshilash bo‘yicha Ochilboy Ramatov boshchiligida alohida ishchi guruh tuziladi” — Shavkat Mirziyoyev
- Shahrisabz va Qamashi tumanlaridagi tog‘oldi va tog‘li turizm hududlarining infratuzilmasini yaxshilash uchun budjetdan 100 milliard so‘m ajratiladi
- Qashqadaryo aholisiga 730 mlrd so‘mlik imtiyozli ipoteka kreditlari hamda ehtiyojmand oilalarga 72 mlrd so‘m subsidiya ajratiladi
Izoh (0)