1-iyuldan ayrim litsenziya va ruxsatnomalarga qo‘yiladigan talab va shartlar bekor qilinadi. Ro‘yxat
O‘zbekistonda 1-iyuldan boshlab ayrim litsenziya va ruxsatnomalarga qo‘yiladigan individual talablar bekor qilinadi. Bu prezident farmoni bilan belgilangan.
Tibbiy faoliyat uchun litsenziya
Mobil ilovalardan foydalangan holda tibbiy faoliyat sohasida masofaviy tibbiy maslahatlar va ko‘riklar tashkil etishda mulk huquqi yoki boshqa qonuniy asosda tegishli binolar, jihozlar va inventarlarning mavjudligi to‘g‘risidagi talab bekor qilinadi.
Farmatsevtika faoliyati uchun litsenziya (dori vositalari va tibbiy buyumlarning chakana savdosi yo‘nalishida)
Ikkita talab bekor qilinadi:
- narxi xaridor tomonidan to‘lanadigan dori vositalari va tibbiy buyumlar dorixonalardan olib yetkazib berilganda yuridik shaxslarning shtatlarida farmatsevt bo‘lishi lozimligi;
- aloqa vositalari orqali maslahat berilganda dori vositalari va tibbiy buyumlarni yetkazib berish uchun dorixona xodimi farmatsevtik ma’lumotga ega mutaxassis bo‘lishi lozimligi.
Arxitektura-shaharsozlik hujjatlarini ishlab chiqish faoliyati uchun litsenziya
Ikkita talab bekor qilinadi:
- mulk huquqi asosida yoki boshqa qonuniy asosda tegishli bo‘lgan binolar, xonalar, asbob-uskunalar va jihozlarning mavjud bo‘lishi;
- xorijdan kelgan buyurtmalar bo‘ycha milliy standartlar va talablarga rioya etilishi.
Fiskal xotirali nazorat-kassa mashinasini ro‘yxatga o‘tkazish kartochkasi
Tovarlar, ishlar va xizmatlarni realizatsiya qilishda naqd pul mablag‘larining hisobini yuritishda fiskal xotirali nazorat-kassa mashinalaridan foydalanish uchun statsionar punktga ega bo‘lish va xizmat ko‘rsatuvchi bank bilan naqd pul tushumlarini inkasso qilish to‘g‘risida shartnoma mavjud bo‘lish talablari bekor qilinadi.
O‘zbekiston Respublikasi hududida mehnat qilish huquqini tasdiqlash
Xorijda turib masofaviy (onlayn) shaklda faoliyat ko‘rsatish uchun O‘zbekiston Respublikasi hududida mehnat faoliyatini amalga oshirish huquqini beruvchi tasdiqnoma olish talabi bekor qilinadi.
Zargarlik buyumlarini hamda qimmatbaho metallar va qimmatbaho toshlardan yasalgan va boshqa buyumlarni sotish faoliyatini boshlaganlik yoki tugatganlik to‘g‘risida xabarnoma
Bu yo‘nalishda internet-do‘kon shaklidagi kompaniyalar uchun mulk yoki boshqa huquq asosida tegishli bo‘lgan bino va inshootlarning mavjudligi to‘g‘risidagi talab bekor qilinadi.
Avvalroq O‘zbekistonda 1-iyuldan bir qator soliq va bojxona imtiyozlari bekor qilinishi haqida xabar berilgan edi.
