“Bosh hamshira va katta hamshira yer ag‘darganini hech qayerda ko‘rmagandim” — Poytaxtda tibbiyot xodimlari majburiy mehnatga jalb qilinganini aytmoqda
Toshkent shahridagi majburiy davolash narkologiya shifoxonasi xodimlari majburiy tartibda yer ag‘darish ishlariga jalb qilingan. Bu haqda “Daryo”ga tibbiyot xodimlaridan biri ma’lum qildi.
Yer ag‘darayotgan tibbiyot xodimlari shifoxonada har kuni shu ahvol ekanini aytmoqda.
Videoda yer ag‘darayotgani ko‘ringan tibbiyot xodimlaridan biri rahbariyati topshirig‘idan norozi bo‘lib, “bosh hamshira va katta hamshiraning yer ag‘darish ishlariga jalb qilinganini hech qayerda ko‘rmaganman”, desa, boshqasi “hudud judayam katta — sakkiz gektar, eplab bo‘lmayapti ekan, shu sabab biz ham bu ishga jalb qilinganmiz”, deydi.
Videoda ko‘ringan tibbiyot xodimlari shifoxonadagi barcha xodimlar yer ag‘darish ishlariga jalb qilingani sabab bemorlar nazoratsiz qolganini aytib, ularga kim qarashi mumkinligini muhokama qiladi.
Xodimlardan biri “biz bemorlarga qarasak, yerni kim chopadi”, deya savol bersa, yana bir xodim esa mazkur shifoxona xodimlari e’tiborsiz qolmasligi kerakligini aytadi.
Yer ag‘darayotgan tibbiyot xodimlarining o‘zaro suhbatida ularga gul ekish majburiyati ham yuklatilganini, eng achinarlisi, ekilishi lozim bo‘lgan gulni ham o‘z mablag‘i evaziga olib kelishi kerakligi anglashiladi.
“Daryo”ning bu haqdagi so‘roviga javob bergan Bandlik va mehnat munosabatlari vazirligi axborot xizmati rahbari Mavjuda Mirzayeva holat e’tiborga olinganini, tez orada aybdorlarga chora ko‘rilishini ma’lum qildi. Sog‘liqni saqlash vazirligi axborot xizmati rahbari Furqat Sanayev esa holat uyushtirilgan bo‘lishi ham mumkinligini taxmin qilib, Toshkent shahar sog‘liqni saqlash boshqarmasi mas’ullari vaziyatga aniqlik kiritgach, barchasi ma’lum bo‘lishini bildirdi.
“Daryo” mavzuga qaytadi.
Mavzuga doir: Qashqadaryoda tibbiyot xodimlarini majburiy mehnatga jalb qilgan bosh shifokor javobgarlikka tortildi
