Buxoroda 500 dollar pora olmagan IIB xodimi 10 mln so‘m bilan mukofotlandi
Buxoro hamda Qoraqalpog‘istonda pora olmagan Ichki ishlar organlari xodimlari taqdirlandi. Bu haqda IIB matbuot xizmatlari xabar qildi.
Ma’lum qilinishicha, ish yurituvidagi jinoyat ishi bo‘yicha 500 AQSh dollar pora taklif qilayotgan fuqaro haqida belgilangan tartibda xabar bergan Buxoro viloyati Ichki ishlar boshqarmasi huzuridagi Tergov boshqarmasi xodimi 10 000 000 (o‘n million) so‘m pul mukofoti bilan rag‘batlantirilgan.
Bundan tashqari, Qoraqalpog‘iston Ichki ishlar vazirligi huzuridagi Tergov boshqarmasi ish yurituvida bo‘lgan fuqaro S.X.ga nisbatan Jinoyat kodeksining 276-moddasi 2-qismi “a” bandi (giyohvandlik vositasini saqlash) bilan qo‘zg‘atilgan jinoyat ishi bo‘yicha, fuqaro S.X. Tergov boshqarmasi boshlig‘i o‘rinbosari podpolkovnik A.Utemuratovga bir necha marotaba, o‘ziga nisbatan qo‘zg‘atilgan jinoyat ishini sudga yubormaslik evaziga 5 000 AQSh dollari miqdoridagi pullarni pora tariqasida taklif qilgan.
Podpolkovnik A.Utemuratov Qoraqalpog‘iston IIV rahbariyatiga bildirgi bilan murojaat qilib, o‘z bildirgisida, fuqaro S.X.ga pora berish jinoyat ekani, jinoiy javobgarlikka tortilishi haqida bir nechta marta tushuntirib, ogohlantirishiga qaramasdan, pora taklif qilib kelayotganini bildirib, unga nisbatan qonuniy chora ko‘rishni so‘ragan.
Ushbu bildirgiga asosan, o‘tkazilgan tezkor tadbirda fuqaro S.X. taklif qilgan 5 000 AQSh dollar pullarni podpolkovnik A.Utemuratovga bergan vaqtida, tadbir ishtirokchilari tomonidan qo‘lga olinib, ashyoviy dalillar tegishli tartibda hujjatlashtirilib olingan hamda O‘zbekiston Bosh prokuraturasi Iqtisodiy jinoyatlarga qarshi kurashish departamenti Qoraqalpog‘iston boshqarmasi tomonidan fuqaro S.X.ga nisbatan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilib, dastlabki tergov harakatlariga kirishilgan.
2021-yilning 22-may kuni Qoraqalpog‘iston Ichki ishlar vazirligida Ichki ishlar vaziri polkovnik A.Temirxanov tomonidan kasbiga sodiq bo‘lib, taklif qilgan porani olmagan podpolkovnik A.Utemuratovga pul mukofoti uning yaqin qarindoshiga vazirlik rahbariyatining tashakkurnomasi va qimmat baho sovg‘alar tantanali ravishda topshirildi.
Podpolkovnikka mukofot tariqasida qancha pul berilgani ma’lum qilinmagan.
Bundan avval Samarqandda 2 ming dollar pora olmagan IIB xodimiga 15 mln so‘m mukofot puli berilgani hamda Toshkent viloyatida 1000 dollar porani olmagan kadastr xodimiga 10 mln so‘m pul va sihatgohga 2 kishilik yo‘llanma berilgani haqida xabar berilgandi.
