Toshkentda hakamlik sudlari sudyasi pora bilan qo‘lga tushgani haqidagi xabarlar rad etildi

4-aprel kuni Toshkent shahrida ishni javobgarning foydasiga hal qilib bermoqchi bo‘lgan hakamlik sudi sudyasi qo‘lga olingani to‘g‘risida xabar berilgandi. O‘zbekiston hakamlik sudlari assotsiatsiyasi bayonot bilan chiqib, qo‘lga olingan shaxs hakamlik sudi sudyasi ekanini rad etdi, deb xabar beradi O‘zA.

“Toshkent shahar Hakamlik sudining sudyasi 2,5 ming dollarni pora tariqasida olayotganda ushlandi, degan xabarlar ommaviy axborot vositalarida keng tarqaldi. Toshkent shahar hakamlik sudining sudyalari pora bilan ushlangan emas. Jinoyat ustida pora bilan ushlanganlar xalqaro arbitraj sudining sudyalaridir”, — deyiladi raddiyada.

Bosh prokuratura huzuridagi Iqtisodiy jinoyatlarga qarshi kurashish departamenti o‘zi tarqatgan xabarga qo‘shimcha tuzatish kiritgan: “Firibgarlik jinoyati ustida ushlangan M.K.ning shaxsiga aniqlik kiritilganda, u ‘H.A.’ MCHJ huzuridagi doimiy faoliyat ko‘rsatuvchi xalqaro arbitraj sudi sudyasi ekani aniqlandi. Hozirda ushbu jinoyat ishi bo‘yicha tergov harakatlari davom ettirilmoqda”.

Bundan oldin Andijonda jinoyat ishi bo‘yicha tergov jarayonini ijobiy hal etish uchun 8 ming dollar olgan shaxs ushlangani, Sirdaryoda ikki mahkumni 136 million so‘m evaziga ozodlikka chiqarib berishni va’da qilgan shaxs aniqlangani to‘g‘risida xabar berilgandi.