“Buxoroda so‘nggi ikki yilda tibbiyot xodimlarini ishga olishda 28 ta holatda tamagirlikka yo‘l qo‘yilgani ma’lum bo‘ldi” — Buxoro viloyati hokimi

Buxoro viloyati hokimi Botir Zaripovning tibbiyot xodimlari bilan bo‘lgan muloqotida so‘nggi ikki yilda viloyatda tibbiyot xodimlarini ishga olishda 28 ta holatda tamagirlikka yo‘l qo‘yilgani ma’lum qilindi. Bu haqda “Daryo” muxbiri xabar berdi.

Botir Zaripovning so‘ziga ko‘ra, viloyatda so‘nggi besh yilda 350 milliard so‘m hisobidan 119 ta tibbiyot muassasasi yangi qurilgan va ta’mirlangan. Shuningdek, ushbu binolarga 226 milliard so‘m evaziga 6600 ta zamonaviy tibbiy texnika va asbob-uskunalar olib kelingan.

“Shuncha sharoit, imkoniyat yaratilayotganiga qaramay, afsuski, vaziyat maqtanadigan darajada emas. Tibbiyot xodimlari tomonidan tamagirlikka yo‘l qo‘yish holatlari, ishga qabul qilish tartibi kabi masalalarda poraxo‘rliklarning avj olayotgani og‘riqli nuqtaga aylanmoqda. Sohada zamonaviy informatsion texnologiyalar masalasida ham jiddiy siljish kuzatilmayapti. Elektron poliklinika, elektron tibbiy karta, elektron kasallik tarixi, shifokor qabuliga elektron navbatga yozilish va shu kabi boshqa zamonaviy informatsion texnologiyalarning tizimda to‘la joriy etilmasligi korrupsiyaning avj olishiga zamin yaratmoqda”, — dedi Botir Zaripov.

Viloyat rahbarining ma’lum qilishicha, tibbiyot muassasalari xodimlari tomonidan 2020-yilda tamagirlik yo‘li bilan ishga joylashtirish bilan bog‘liq 12 ta, 2021-yilda esa 16 ta jinoyat sodir etilgan. Bo‘sh ish o‘rinlarini yashirish bilan bog‘liq jarayonda esa 33 marotaba qonunbuzilish holati aniqlanib, aybdor mansabdorlarning ma’muriy javobgarlik masalasi hal etilgan. Tibbiyot xodimlari o‘rtasida nosog‘lom muhitning paydo bo‘layotgani bemorlarning sarson bo‘lishiga yoki ularga nisbatan tamagirlik sodir etilishiga sabab bo‘lgan.

Qo‘shimcha qilinishicha, viloyatdagi tibbiyot muassasalarida 40 613 nafar xodim faoliyat yuritmoqda. Hududda shifokorlarga bo‘lgan ehtiyoj 301 shtat birligini tashkil qiladi.