O‘zbekistonning olis hududlarida aprel oyida maxsus konteynerli 1 ming 700 ta mahalla tibbiyot punkti tashkil etiladi

Shavkat Mirziyoyev 28-mart kuni sog‘liqni saqlash sohasi vakillari bilan o‘tkazilgan ochiq muloqotda belgilangan vazifalarni amalga oshirish chora-tadbirlariga bag‘ishlangan videoselektor yig‘ilishi o‘tkazdi. Unda davlat rahbari tibbiyot sohasiga doir qator vazifalarni belgilab berdi, deb xabar bermoqda prezident matbuot kotibi.

Qayd etilishicha, aprel oyida:

• 1 million nafar xavf guruhiga kiruvchilar, 700 ming nafar bolalar va 100 ming nafar homilador ayollar maqsadli skriningdan o‘tkaziladi;
• har bir oilaviy poliklinikada kunduzgi statsionarlarni tashkil etish orqali tuman va shahar shifoxonalariga yotadigan bemorlarning navbati kamida 20 foizga qisqartiriladi;
• 26 ta oilaviy shifokorlik punkti to‘liq ta’mirlandi, zarur shtatlar, asbob-uskuna va dorilar bilan ta’minlanadi.

Yil yakuniga qadar jami 400 ta mahalla uchun bunday punktlar ochilishi ta’minlanadi. Shuningdek, aprel oyida olis hududlarda maxsus konteynerlardan foydalangan holda 1 ming 700 ta mahalla tibbiyot punktini tashkil etish vazifasi qo‘yilgan.