2021-yili kamchilikka yo‘l qo‘ygan 220 nafar sudya intizomiy javobgarlikka tortilgan — Sudyalar Oliy kengashi
2021-yilda kamchilikka yo‘l qo‘ygan 220 nafar sudya intizomiy javobgarlikka tortilib, 19 nafar sudyaning vakolati muddatidan ilgari tugatilib, vazifasidan ozod etilgan. Bu haqda Sudyalar Oliy kengashi raisi o‘rinbosari Alisher Jalilov 28-mart kuni Sudyalar Oliy kengashi mutasaddilari ishtirokida bo‘lib o‘tgan matbuot anjumanida ma’lum qildi, deb xabar berdi “Daryo” muxbiri.
Ta’kidlanishicha, 2021-yilda viloyat va unga tenglashtirilgan sudlar faoliyati o‘rganilib, kamchilikka yo‘l qo‘ygan 220 nafar sudya intizomiy javobgarlikka tortilgan. Bundan tashqari 19 nafar sudyaning vakolati muddatidan ilgari tugatilib, vazifasidan ozod etilgan.
Qayd etilishicha, 2022-yilning birinchi choragida esa 22 nafar sudyaning vakolati muddatidan ilgari tugatilib, vazifasidan ozod etilgan bo‘lsa, intizomiy javobgarlikka tortilganlar 80 nafarni tashkil etadi.
“Shuningdek, 2021-yilda vakolat muddati tugagan 12 nafar, 2022-yilning birinchi choragida 4 nafar sudya navbatdagi muddatga noloyiq deb topilgan. Bundan tashqari, 2021-yilda odil sudlovga aralashish bilan bog‘liq 4 ta holat bo‘yicha xizmat tekshiruvlari o‘tkazilib, aniqlangan holatlar bo‘yicha Sudyalar oliy kengashi raisi tomonidan bosh prokurorga o‘z vaqtida taqdimnomalar kiritilgan”, — deydi Sudyalar Oliy kengashi raisi o‘rinbosari Alisher Jalilov.
Ma’lum qilinishicha, aybdor shaxslarga nisbatan 2 ta jinoyat ishi va 2 ta ma’muriy ish qo‘zg‘atilgan.
“2022-yil birinchi choragida sudyalar daxlsizligi buzilishining va ularning odil sudlovni amalga oshirish borasidagi faoliyatiga aralashish bo‘yicha holat qayd etilmadi. Biroq sudyalar daxlsizligiga ta’sir o‘tkazishi ehtimoli yuz bergan holatlar bo‘yicha Kengash matbuot xizmati tomonidan 3-marta bayonot berilib, voqelikka munosabat bildirildi”, — deydi Sudyalar Oliy kengashi raisi o‘rinbosari.
Ta’kidlanishicha, World Justice Project tashkilotining 2021-yilgi Huquq ustuvorligi indeksidagi natijalarida COVID-19 pandemiyasi sabab 74,2 foiz mamlakatda huquq ustuvorligi ko‘rsatkichlari pasaygani ko‘rsatilgan. O‘zbekistonga berilgan baholar esa 4,1 foizga oshib, 139 ta davlat orasida 85-o‘rinni egallagan.
