O‘zbekistonda qishloq xo‘jaligi yerlaridan foydalanuvchilarga har bir gektar maydonga 1 mln so‘mdan subsidiya ajratiladi

“Paxta maydonlarida tuproq unumdorligini va hosildorlikni oshirish, sug‘orishning yangi texnologiyalarini joriy etishni qo‘llab-quvvatlash chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar berdi.

Qarorga ko‘ra, qishloq xo‘jaligi yerlaridan foydalanuvchi (ijarachi)larga paxta maydonlarida tuproq unumdorligini oshirish tadbirlari uchun 2022–2023-yillarda sinov tariqasida rag‘batlantirishning quyidagi mexanizmlari joriy etiladi:

• tuproq unumdorligini oshirish va eroziyadan muhofaza qilish tadbirlarini amalga oshirganlik uchun soliq imtiyozlari beriladi;
• yerlarni tiklash, qayta foydalanishga kiritish va yangidan o‘zlashtirish, rekultivatsiyalash va melioratsiyalash tadbirlarini bajarish uchun subsidiyalar ajratiladi va yer solig‘idan qisman ozod etiladi.

2022-2023 yillarda sinov tariqasida:

• tuproq unumdorligi va paxta hosildorligini oshirish, ilmiy asoslangan almashlab ekishni va sug‘orishning yangi texnologiyalarini joriy etish hamda o‘simliklar himoyasi bo‘yicha xizmatlarni yo‘lga qo‘yish va zamonaviy laboratoriyalarni barpo etish uchun yerdan foydalanuvchi (jumladan, klaster)larga davlat budjeti mablag‘lari hisobidan har bir gektar maydonga 1 million so‘mdan subsidiya ajratiladi;
• paxta maydonlarida tuproq unumdorligi va hosildorlikni oshirganlik uchun soliq imtiyozlari tuproq bonitirovkasi tahlili natijalari bo‘yicha tuproq unumdorligi oshgan yerdan foydalanuvchilarga tatbiq etiladi;
• yer solig‘i bo‘yicha imtiyozlar 3 yil muddatga amal qiladi.

Qarorga ko‘ra, subsidiya ajratish tajribasi tegishli ro‘yxat bo‘yicha 13 ta tumanda sinovdan o‘tkaziladi.

Avvalroq O‘zbekistonda bahorgi sovuqlar davrida qishloq xo‘jaligi mahsulotlari yetishtiruvchilarni qo‘llab-quvvatlash uchun tezkor guruhlar tashkil etilgani to‘g‘risida xabar berilgandi.