Ijtimoiy tarmoqlarda bir yigitning to‘xtab turgan YPX avtomobili ustidan yurib o‘tgani tasvirlangan video tarqaldi. IIV YHXBB holatga munosabat bildirib, huquqbuzar yigitning shaxsiga aniqlik kiritilganini ma’lum qildi.
Ma’lum qilinishicha, 25-yanvar kuni soat 15:00 larda Qo‘ng‘irot tumani, Ipak yo‘li ko‘chasida ko‘rinishidan voyaga yetmagan bola yo‘l harakati xavfsizligi boshqarmasiga tegishli bo‘lgan, to‘xtab turgan Lacetti maxsus xizmat avtomobilining ustiga chiqqan. Uning mazkur xatti-harakatlari do‘sti tomonidan tasvirga olingan va u ijtimoiy tarmoqda tarqatilgan.
Holat yuzasidan surishtiruv olib borilganda, mazkur huquqbuzarlikni voyaga yetmagan, 17 yoshli B.T. sodir qilgani aniqlangan. Hududiy profilaktika inspektori tomonidan to‘plangan hujjatlar voyaga yetmaganlar ishlari bo‘yicha tuman idoralararo komissiyasi tomonidan o‘rganilib, ushbu voyaga yetmagan bolaning otasi J.T.ga nisbatan Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) birinchi qismi tartibida BHMning bir baravari miqdorida (270 ming so‘m) jarima jazosi belgilangan.
Avvalroq Samarqandda YPX inspektoriga qo‘l ko‘targan shaxsga nisbatan jinoyat ishi qo‘zg‘atilib, qamoqqa olingani, Toshkentda YPX xodimlariga soxta hujjat ko‘rsatib, o‘zini prokuror deb tanishtirib yurgan Malibu haydovchisi ushlangani, Qoraqalpog‘iston YHXB boshlig‘i o‘z xodimlarini haqoratlab, urgani to‘g‘risida xabar berilgandi.
Izoh (0)