Bahodir Jalolov Dubayda polshalik bokschini nokautga uchratdi. Bu uning prof boksdagi ketma-ket 10-g‘alabasi

Professional boksning og‘ir vazn toifasida (+90,7 kg) harakat qilib kelayotgan Bahodir Jalolov (10-0, 10 KO) 18-mart, juma kuni Dubaydagi jang kechasida ringga ko‘tarildi.

Probellum Dubai musobaqasida o‘zbekistonlik bokschiga Polsha vakili Kamil Sokolovski  (11-26, 4 KO) raqiblik qildi. Bahodirning ustunligida o‘tgan bahs 5-raundda o‘z nihoyasiga yetdi. Jalolov ketma-ket kuchli zarbalar yo‘llab, raqibini nokautga uchratdi.

Qayd etish kerak, mazkur jang 8 raundga mo‘ljallangan edi. Jang videosini bu yerda tomosha qilish mumkin — ko‘rish.

Jalolov professional boksdagi bundan avvalgi jangini dekabr oyida kolumbiyalik Xulio Sezar Kalimenoga qarshi o‘tkazib, birinchi raunddayoq nokaut bilan g‘alaba qozongandi. Kamil Sokolovskining so‘nggi jangi 2022-yil 5-fevral kuni shvetsiyalik Otto Vallinga qarshi bo‘lib o‘tgan. Polshalik bokschi raqibiga imkoniyatni boy bergan.

Ma’lumot uchun, Bahodir shu vaqtgacha prof boksda 9 ta jang o‘tkazib, ularning barchasida nokaut evaziga g‘alaba qozongan. Avvalroq uning Probellum kompaniyasi bilan shartnoma imzolagani haqida xabar berilgandi.