Qo‘qon shahrida Janubiy Koreya kompaniyasi tomonidan Hanshin Park City shaharchasi bunyod etiladi. Shaharchadan 127 ta ko‘p qavatli uy, taunxauslar, park, maktab, bolalar bog‘chasi va boshqa zarur ijtimoiy obyektlar o‘rin oladi, deb xabar bermoqda “Daryo” muxbiri Azizjon Ermatov.
Farg‘ona viloyati hokimi Xayrullo Bozorov boshchiligidagi delegatsiya Janubiy Koreyada bo‘lib, Hanshin Engineering & Construction kompaniyasi rahbari Choy Mun Kyu bilan uchrashuv o‘tkazgan.
Muzokaralar natijasida viloyat hokimligi hamda Hanshin Engineering & Construction kompaniyasi o‘rtasida Qo‘qon shahrida Hanshin Park City shaharchasini barpo etish bo‘yicha qiymati 250 million dollarlik investitsion kelishuv imzolangan.
Kelishuvga ko‘ra, Koreya kompaniyasi Qo‘qon shahrida 9, 12 va 16 qavatli 5 ming 122 xonadondan iborat ijtimoiy obyektlardan iborat Hanshin Park City shaharchasini barpo etadi.
Ko‘p qavatli uylarning yerto‘la qismida besh mingdan ziyod avtomobil uchun yerosti avtoturargohi o‘rin oladi. Uch yillik reja asosida amalga oshiriladigan loyihaning ilk bosqichida 206 ta xonadondan iborat oltita to‘qqiz qavatli turar joy binosi qad rostlaydi.
Izoh (0)