Buxoroda prezidentdan dakki eshitgach, ishdan olingan sobiq amaldor hududiy boshqarmalardan biriga rahbarlik qilishni boshladi

Buxoro viloyatida prezident Shavkat Mirziyoyevdan dakki eshitib, so‘ngra ishdan olingan sobiq amaldor yangi lavozimga tayinlandi, deya xabar berdi “Daryo” muxbiri.

Ma’lum bo‘lishicha, davlat rahbarining viloyatga tashriflaridan birida prezidentning “Kamroq gapiring, menga balandparvoz gaplar yoqmaydi”, degan e’tiroziga sabab bo‘lgan sobiq amaldor Yo‘ldosh Jumayev viloyat kasbiy ta’limni rivojlantirish va muvofiqlashtirish hududiy boshqarmasi boshlig‘i lavozimiga tayinlangan.

Qayd etilishicha, Shavkat Mirziyoyevning Buxoroga tashrifi paytida Yo‘ldosh Jumayev viloyat hokimining sobiq o‘rinbosari, viloyat mahalla va oilani qo‘llab-quvvatlash boshqarmasi boshlig‘i vazifasida ishlab kelgan. Shundan so‘ng lavozimidan olingan sobiq rahbar 2021-yilning 21-dekabridan beri ishsiz bo‘lgan.

Yo‘ldosh Jumayev 1967-yil Buxoro viloyatining Romitan tumanida tug‘ilgan. 1991-yilda Buxoro davlat pedagogika instituti, 1999-yilda Buxoro davlat universitetini, 2002-yilda Davlat va jamiyat qurilishi akademiyasini tamomlagan.

U faoliyati davomida Romitan tumani hokimi o‘rinbosari, Kogon tumani hokimi lavozimlarida ishlagan.