Farg‘ona viloyatida Malibu-2 rusumli avtomashinada nuqsonlar borligi kuzatilgani bois yangisiga almashtirilib berildi, deya xabar bermoqda Iste’molchilar huquqlarini himoya qilish agentligi.
Ma’lum qilinishicha, Rishton tumanida yashovchi fuqaro Malibu-2 avtomobilini 2020-yilning may oyida sotib olgan. Bir necha oy o‘tgach, avtomobil egasi kuzovdan bo‘yoq sizib chiqa boshlaganini payqab qolgan. Iste’molchi “Kokand Auto Trade” MChJ avtosaloniga bir necha oy murojaat qilgan. Murojaat natijasiz bo‘lganidan so‘ng, iste’molchi Monopoliyaga qarshi kurashish qo‘mitasi huzuridagi Iste’molchilar huquqlarini himoya qilish agentligida murojaat qoldirgan.
Chakana savdo qoidalariga asosan kafolat muddati mobaynida avtomobillarni almashtirish, kuzov yoki kamida ikkita agregatni almashtirish zarur bo‘lgan taqdirda, ekspert komissiyasi qaroriga ko‘ra (ushbu qoidalarning 130-bandiga muvofiq) amalga oshiriladi.
Xususan, xizmat ko‘rsatish markazi o‘tkazgan ekspertiza natijalariga ko‘ra, kuzovning 113 ta joyida bo‘yoqlarning nuqsonlari borligi qayd etilgan. Ekspertizadan so‘ng, iste’molchi bir necha oy davomida avtomobil bilan bog‘liq muammolarni hal qilish uchun ishlab chiqaruvchiga ham, avtosalonga ham qayta-qayta murojaat qilgan.
Iste’molchilar huquqlarini himoya qilish agentligining Toshkent shahar hududiy tuzilmasi tomonidan 2021-yilning 8-oktabr kuni ro‘yxatga olingan murojaatga ko‘ra, tuzilma xodimlari tomonidan UzAuto Motors AJ va “Uzavtotexxizmat” MChJga so‘rov xati jo‘natilgan va ishning barcha tafsilotlari birgalikda o‘rganib chiqilgan.
O‘rganish natijalariga ko‘ra, ushbu masala iste’molchi foydasiga hal qilingan, ya’ni iste’molchi bilan “Uzavtotexxizmat” MChJ o‘rtasida tuzilgan shartnoma asosida Malibu-2 nuqsonli avtomobil xuddi shunday rusumdagi yangi avtomobilga aylashtirilgan.
Avvalroq Buxoroda 10 kilometr ham yurmagan Tracker’ning nuqsonlari chiqqani bois yangisiga almashtirib berilgandi.
Izoh (0)