Namanganga Pokistonning Panjob viloyati gubernatori Muhammad Sarvar Chaudxri boshchiligidagi delegatsiya keldi. Bu haqda “Daryo” muxbiri Azizbek Abduvaliyev xabar bermoqda.
Mehmonlarni Namangan xalqaro aeroportida viloyat hokimi Shavkat Abdurazzoqov va uning o‘rinbosarlari kutib oldi.
Namangan shahridagi “Ma’rifat markazi” binosida Pokiston delegatsiyasining rasmiy qabuli bo‘lib o‘tdi.
Qabul davomida bundan roppa-rosa bir yil avval “Birodarlashgan hududlar” deya e’lon qilingan Namangan va Panjob viloyatlari o‘rtasida amalga oshirishga kirishilgan ilk loyihalar taqdimotlari o‘tkazildi.
Shuningdek, mehmonlarga Namanganning investitsiyaviy salohiyatini aks ettiruvchi film namoyish etildi.
“Pokistonning eng yirik viloyati bo‘lgan Panjob bilan aloqalarni yanada mustahkamlash biz uchun muhim ahamiyatga ega. Xususan, Namangan viloyatida oliy o‘quv yurtlari sonini oshirish, tibbiyot klasterini yaratish bo‘yicha hamkorlikdagi amaliy ishlarimizni izchil davom ettiramiz”, — dedi Shavkat Abdurazzoqov.
Panjob viloyati gubernatori boshchiligidagi delegatsiya Namangan shahrining Davlatobod tumanida barpo etishga kirishilgan New Namangan city — Yangi Namangan shaharchasida bo‘ldi.
Delegatsiya tarkibidagi tadbirkorlar ushbu shaharchada o‘z loyihalari bilan ishtirok etish istagini bildirdi.
Shuningdek, delegatsiya “Yuksalish”, “Yoshlar”, “Kushon” kichik sanoat zonalarida bo‘ldi. Glass expo, Art Soft Ceramics, Hydro Plast korxonalari, Adim Namangan brendi tomonidan bunyod etilayotgan tekstil klasteri, Hugo Boss brendi ostida kiyimlar ishlab chiqarilishi rejalashtirilgan “Lyuks Plyus Servis” MChJ faoliyati bilan tanishdi.
Panjob viloyati delegatsiyasining Namanganga safari davom etmoqda.
Izoh (0)