Gurbanguli Berdimuhamedov Toshhovuzda qurilayotgan elektr tarmog‘i va parrandachilik fermasini ko‘zdan kechirdi. Fermada unga bag‘ishlab doston kuylashdi

20-yanvarda Turkmaniston prezidenti Gurbanguli Berdiumuhamedov Toshhovuz viloyatiga tashrif bilan bordi, deb xabar bermoqda “Xronika Turkmenistana”.

Xabarga ko‘ra, Berdimuhamedov aeroportdan yo‘ltanlamasda Toshhovuz viloyatining Gurbonsulton atrafidagi 500 kilovolt quvvatga ega Bolqon–Toshhovuz elektr uzatish liniyasi qurilishini ko‘zda kechirishga yo‘l olgan.

Turkmaniston prezidentiga Bolqon–Toshhovuz elektr liniyasining qurilishi haqida gapirib berishdi, loyiha mamlakatdagi halqasimon energiya tizimning bir qismiga aylanadi, Berdimuhamedov podstansiyalar va Toshhovuz davlat elektrostansiyasi qurilishining loyihasi bilan ham tanishgan.

Turkmaniston energetika vaziri Xojimurod Rejepmuradov mamlakatdagi elektrostansiyalar faoliyati, jumladan, 10 megavatt quvvatga ega Bolqon viloyatidagi Serdar atrofida joylashgan quyosh va shamol elektrostansiyalari loyihalari haqida hisobot berdi.

Qurilish, sanoat va energetika masalalariga mas’ul bosh vazir o‘rinbosari Chorimurat Purchekov Mariy viloyatidagi davlat elektrostansiyada barpo qilinayotgan “Vatan” GESning Turkmaniston–Afg‘oniston–Pokiston elektruzatish liniyasining bir qismiga aylanishi, shuningdek, Afg‘onistondagi Mozori-Sharifdan Kobulgacha bo‘lgan liniyaga sim tortilishi bo‘yicha rejalar xususida axborot berdi.

Barcha taqdimotlardan keyin Berdimuhamedov energetika masalalariga bag‘ishlangan majlis o‘tkazdi. Uning so‘zlariga ko‘ra, Turkmanistondagi tabiiy resurslardan foydalanilsa mamlakat butun dunyoda eng katta energetik taraqqiy etgan davlatlardan biriga aylanadi.

“Ichki iste’molchining elektrenergiyasi ta’minoti bilan ishonchli va uzluksiz ta’minlanishi lozim, belgilangan hajmdan ortiqcha ishlab chiqarilgan elektr energiyasi turli yo‘nalishlar bo‘yicha boshqa mamlakatlarga eksport qilinadi”, – degan Turkmaniston davlat rahbari.

Berdimuhamedovning qo‘shimcha qilishicha, ayni vaqtda turkman elektrenergiyasi Eron, Afg‘oniston, O‘zbekiston va Turkmanistonga eksport qilinmoqda. Kelgusida elektrni Eron va O‘zbekiston vositasida boshqa bir uchinchi mamlakatga transportirovka qilish ko‘zda tutilgan.

Yig‘ilish yakunida Toshhovuz hokimi Nazarmirot Nazarmiratov viloyatning barcha aholisi nomidan Berdimuhamedovga Bolqon–Toshhovuz halqasimon elektrtizimi bo‘yicha bergan qimmatli maslahatlari uchun minnatdorlik bildirgan.

Majlisdan keyin Gurbanguli Berdimuhamedov Go‘ro‘g‘li etrapidagi parrandachilik fermasiga bordi.

Turkmaniston prezidentiga parranda yetishtirish kompleksidagi ishlar haqida ma’lumot berib, bu yerda tayyorlangan mahsulotlarni namoyish qilishdi. Ishchilardan biri dutorda kuy chalib, Berdimuhamedovga bag‘ishlangan dostonni kuylab berdi.

Bir hafta avval Berdimuhamedov Bolqon viloyatida bo‘lgan, bu yerda mahalliy baliqchilar bilan uchrashgan, ular Turkmaniston davlat rahbariga baxtli turmush kechirayotganliklarini hikoya qilib unga bag‘ishlangan qo‘shiqni kuylashgandi.

Yil boshida Bedimuhamedov Mari va Lebob viloyatlariga ham safar uyushtirgan.