Россияда ўтган бир сутка ичида яна 57 212 кишида коронавирус инфекцияси аниқланди. Бу ҳақда COVID-19 га қарши кураш бўйича федерал тезкор штаб хабар берди.
Таъкидланишича, бу мамлакатда пандемия бошланганидан бери аниқланган энг юқори кўрсаткич ҳисобланади. Бундан олдинги рекорд бир кун олдин қайд этилган — 49 513 киши.
Ўтган бир сутка давомида Россияда 9902 киши шифохонага ётқизилган, 681 киши COVID-19 асоратлари оқибатида вафот этган. Шунингдек, яна 25 525 киши соғайган.
Москванинг ўзида 16 094 кишида коронавирус тасдиқланган — бу ҳам Россия пойтахтида пандемия бошланганидан буён қайд этилган антирекорддир.
Россияда коронавируснинг янги тўлқини омикрон штамми тарқалиши фонида бошланди. Аввалроқ «Роспотребнадзор» раҳбари Анна Попов вазият ёмонлашса, кунлик касалланишлар сони 100 минг кишидан ошиши мумкинлиги ҳақида огоҳлантирган эди.
Бундан олдин Россия ҳукуматининг таркиби яқин вақт ичида максимал даражада масофадан туриб ишлаш тизими форматига ўтказилиши, дунё бўйлаб коронавирус билан касалланиш бир ҳафта ичида 20 фоизга ошгани тўғрисида хабар берилганди.
Изоҳ (0)