Futbol bo‘yicha Afrika Millatlar Kubogida guruh bosqichi yakunlandi va nimchorak final bosqichining barcha juftliklari ma’lum bo‘ldi.

Foto: Goal

Kamerun A guruhida qiyinchiliksiz birinchi o‘rinni egalladi. 3 o‘yinda 2 ta g‘alaba va bitta durang. Ikkinchi o‘rinni egallagan Burkina-Faso va uchinchi o‘rindagi Kabo-Verde jamoalari 4 ochkodan jamg‘arib, pley-off bosqichiga yo‘l oldi.

B guruhida Senegal bitta penalti orqali guruhda birinchi o‘rinni egalladi. 1-turda Sadio Mane 97-daqiqada Zimbabvega penaltidan gol urdi va jamoasining g‘alabasini ta’minladi. Keyingi ikki o‘yinda esa 0:0 hisobidagi durang qayd etildi. Bu esa Senegalning 5 ochko bilan guruhda yetakchilik qilishiga yetarli bo‘ldi. Undan keyingi o‘rinlarda Gvineya va Malavi jamoalari joylashgan. Har ikki terma jamoada ham 4 ochkodan mavjud. Malavi o‘z tarixida birinchi marta pley-off yo‘llanmasini qo‘lga kiritdi.

Marokash C guruhining favoriti edi va shu nomni oqlagan holda birinchi o‘rin bilan guruhdan chiqdi. Pyer-Emerik Obameyangsiz Gabon guruhda ikkinchi o‘rinni egalladi. FIFA reytingida 132-o‘rinda borayotgan Komor orollari ham kutilmaganda pley-off yo‘llanmasiga ega chiqdi. Tarkibida birorta ham Komorda tug‘ilgan futbolchi bo‘lmagan terma jamoa 3 ochko jamg‘arib, eng yaxshi uchinchi o‘rin egalari uchun beriladigan yo‘llanmani qo‘lga kiritdi. Gana esa guruhda to‘rtinchi o‘rinni egalladi va sensatsion tarzda pley-off yo‘llanmasidan mosuvo bo‘ldi.

D guruhida birinchi o‘rinni egallagan Nigeriya mazkur bosqichning uchala o‘yinida ham g‘alaba qozongan yagona jamoa bo‘ldi. Muhammad Saloh boshchiligidagi Misr esa 6 ochko bilan ikkinchi o‘rinni qo‘lga kiritdi.

E guruhida esa kutilmagan vaziyat yuzaga keldi. Musobaqaning amaldagi g‘olibi Jazoir 1 ochko bilan guruhda to‘rtinchi o‘rinni egallab, o‘z yurishini to‘xtatishga majbur bo‘ldi. Bunga qadar jazoirliklar 34 o‘yindan buyon mag‘lubiyatsiz seriya qayd etayotgan edi. Kot-d’Ivuar 7 ochko bilan birinchi, Ekvatorial Gvineya 6 ochko bilan ikkinchi o‘rinni egallab, keyingi bosqichga yo‘l oldi.

F guruhida Mali 2 g‘alaba va bitta durang bilan birinchi o‘rinni egallagan bo‘lsa, Gambiya ham xuddi shunday natija bilan ikkinchi o‘rinni band etdi. Tunis 3 ochko bilan eng yaxshi uchinchi o‘rin egalaridan biriga aylandi.

1/8 finalda quyidagi juftliklar o‘zaro bahs olib boradi:

  • Burkina-Faso — Gabon
  • Nigeriya — Tunis
  • Senegal — Kabo-Verde
  • Mali — Ekvatorial Gvineya
  • Gvineya — Gambiya
  • Kamerun — Komor orollari
  • Kot-d’Ivuar — Misr
  • Marokash — Malavi

Nimchorak final bahslari 23–26-yanvar kunlari bo‘lib o‘tadi.