Toshkent shahri Uchtepa tumanida “Rollton” brendi nomidan qalbaki mahsulot ishlab chiqarayotgan yashirin sex aniqlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departamentning Uchtepa tuman bo‘limi tergovga qadar tekshiruv o‘tkazgan. Unda fuqaro X.M. o‘z uyida yashirin sex tashkil qilib, “Rollton” brendi ostida iste’molchilarning sog‘lig‘i xavfsizligi talablariga javob bermaydigan mahsulotni qo‘lbola ishlab chiqarib, qadoqlab sotish uchun tayyorlab qo‘yilgani aniqlangan.
Xonadondan 464 dona qadoqlangan “Rollton”, 68 kilogram sariq va 7,49 kilogram qizil rangli kukunlar va boshqa mahsulotlar ashyoviy dalil sifatida olingan.
Shuningdek, fuqaro X.M. tomonidan ishlab chiqarilgan mahsulot qalbaki ekani, olingan kukunlar haqiqiy kompaniya tomonidan ishlab chiqarilmagani, qadoqlangan paketlardagi kod raqamlari ham qalbaki ekani aniqlangan.
Holat yuzasidan Jinoyat kodeksining 149-moddasi (mualliflik yoki ixtirochilik huquqlarini buzish), 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Qoraqalpog‘istonda qo‘lbola usulda “Qaratau” spirtli ichimligi ishlab chiqaradigan yashirin korxonalar faoliyatiga chek qo‘yildi
- Farg‘onada Coca-cola, Pepsi va Fanta nomli ichimliklar ishlab chiqarayotgan yashirin sex aniqlandi
- Namanganda noqonuniy ravishda dori ishlab chiqarayotgan yashirin korxona aniqlandi
Izoh (0)