“Oskar” marosimini so‘nggi uch yil ichida birinchi marta boshlovchi olib boradi.  U “O‘rgimchak odam” yulduzi Tom Holland bo‘lishi mumkin

2022-yil mart oyida bo‘lib o‘tadigan “Oskar” mukofotlarini topshirish marosimi uch yil ichida birinchi marta boshlovchi tomonidan olib boriladi. Bu haqda Variety nashri ABC Entertainment rahbari Kreyg Ervichga asoslanib xabar bermoqda, deb yozadi Esquire.

Ervich televideniye tanqidchilari uyushmasining virtual press-turi chog‘ida shouni boshlovchi olib borishini e’lon qildi. Shu bilan birga, u tadbir mezbonining ismini aytmadi, faqat hazil bilan: “Bu men bo‘lishim mumkin” — deb aytib o‘tdi.

“Oskar” taqdirlash marosimini oxirgi marta 2018-yilda boshlovchi olib borgan. Marosimni 2017-yildagidek komik aktyor Jimmi Kimmel olib borgan. Keyin aktyor Kevin Xart mezbon bo‘lishi kerak edi, lekin oxirida u yuz bergan janjal tufayli taklifni rad etdi. Shundan so‘ng tadbir boshlovchisiz qoldi va keyinchalik uning reytingi oshgani sababli tashkilotchilar ushbu formatni saqlab qolishga qaror qildi.

The Hollywood Reporter nashrining yozishicha, marosim allaqachon “O‘rgimchak odam” yulduzi Tom Hollandni navbatdagi boshlovchi bo‘lishga nomzod qilib qo‘ygan. 2022-yil 27-mart kuni Los-Anjelesda Amerika kinoakademiyasining 94-marosimi bo‘lib o‘tadi. Nomzodlar esa 2022-yil 8-fevral kuni e’lon qilinadi.