Vashington va London Kiyevni Moskvadan uyushtirilishi mumkin bo‘lgan hujumlarga tayyorlash uchun Ukrainaga yashirin ravishda kiberxavfsizlik bo‘yicha mutaxassislarni yuborgan. Bu haqda The New York Times gazetasi manbalarga tayanib xabar berdi.
AQSh va Buyuk Britaniyada Rossiya Ukrainaning elektr tarmoqlari, bank tizimi hamda “Ukraina iqtisodiyoti va hukumatining boshqa muhim obyektlariga” kiberhujumlar uyushtirishi mumkin, degan qarashlar mavjud. AQSh razvedkasiga ko‘ra, Rossiyaning maqsadi — Ukraina prezidenti Vladimir Zelenskiyni “qobiliyatsiz va himoyasiz” siyosatchi sifatida ko‘rsatish va ehtimol, bosqinchilik uchun shuni bahona qilish.
Bunday hujumlarning bo‘lishi ehtimoldan yiroq emas, chunki Ukraina elektr tarmoqlari sovet davrida qurilgan, keyin esa Rossiya uskunalari bilan modernizatsiya qilingan, deb tushuntirdi NYT manbalari. Taxminlarga ko‘ra, rossiyalik xakerlar Ukraina tizimlari qanday ishlashini biladi, shuningdek, ichki ma’lumotlarni olib turgan bo‘lishi ham mumkin.
Nashr suhbatdoshlarining so‘zlariga ko‘ra, agar Rossiya kiberhujum qilishga qaror qilsa, bu katta ehtimol bilan Rojdestvo bayramidan keyin yanvar oyining birinchi haftasi oxirida sodir bo‘ladi.
Ukrainaga mutaxassislar yuborilgani haqidagi ma’lumotga ikkala davlatdan ham rasmiy izoh berilmagan. AQSh prezidenti Jo Bayden ma’muriyati “Ukrainaning kibermudofaa tizimini mustahkamlash borasidagi sa’y-harakatlarini anchadan buyon qo‘llab-quvvatlab kelayotganini” aytgan. Britaniya hukumati esa London va uning ittifoqchilari tomonidan Kiyevga ko‘rsatilayotgan yordam mudofaa xarakteriga ega ekanini bildirgan.
NYT manbalari, o‘z navbatida AQShning Ukrainada kibermudofaa kuchlarini, jumladan, AQSh Kiberqo‘mondonligi resurslarini kengroq miqyosda joylashtirish imkoniyatini ko‘rib chiqayotganini ta’kidlamoqda.
Eslatib o‘tamiz, Rossiya qo‘shinlarining Ukraina bilan chegarada to‘planayotgani haqida ma’lumotlar 2021-yilning kuzida paydo bo‘lishni boshladi. G‘arb OAV manbalariga ko‘ra, Ukrainaga hujumda 100-175 ming rossiyalik askar ishtirok etishi mumkin. Kreml bu xabarlarni “quruq, asossiz holda keskinlikni kuchaytirish” deb atadi. AQSh rasmiylarining fikricha, Rossiya prezidenti Vladimir Putin Ukrainaga bostirib kirish to‘g‘risida hali qaror qabul qilmagan.
Bu orada Yevropada xavfsizlik kafolatlari bo‘yicha muzokaralar boshlandi. Rossiya Tashqi ishlar vazirligi AQSh va NATO bilan kelishuv loyihalarini e’lon qildi. Rossiya tomoni boshqa narsalar qatori NATOga Ukrainani alyansga qo‘shilishdan chetlashtirishni, shuningdek, Sharqiy Yevropa va Markaziy Osiyoda har qanday harbiy faoliyatdan voz kechishni taklif qildi. AQSh Rossiyaning takliflarini ko‘rib chiqqanini, ammo Yevropa davlatlarining ishtirokisiz ularni muhokama qilmoqchi emasligini ma’lum qildi.
Izoh (0)