Bugun,

  • USD 11095.31
  • RUB 173.84
  • EUR 10772.44

Toshkent shahri Chilonzor tumanidagi “Shovotlandiya” kafesida 27-fevral o‘t qo‘yilgan, buning oqibatida 5 kishi halok bo‘lgandi. Tezkor qidiruv tadbirlari natijasida jinoyatni sodir etgan shaxs shu kunning o‘zidayoq ushlangan. “Gazeta.uz” manbasining ma’lum qilishicha, 21 dekabr kuni mazkur jinoyat yuzasidan sud hukmi o‘qilgan.

Voqea qanday sodir bo‘lgandi?

Sud hujjatlariga ko‘ra, 36 yoshli sudlanuvchi ilgari bir necha uyushgan jinoiy guruhlar mavjud bo‘lgan qurolli jinoiy uyushmani boshqargan va “avtoritet” degan nom chiqargan. Sodir etgan jinoyatlari uchun jazo o‘tash vaqtida 26 yoshli sudlanuvchi bilan tanishib qolgan. Shu orada 26 yoshli sudlanuvchi tomonidan o‘zini “boss” sifatida qabul qilinishiga erishgan.

26 yoshli sudlanuvchi qamoqdan chiqqach, 36 yoshli sudlanuvchi uni o‘zi ishlab kelayotgan Zangiota tumani “Eshonguzar” qo‘rg‘onidagi choyxonaga ishga olgan va uni o‘ziga moliyaviy jihatdan tobe qilib qo‘ygan. Oqibatda esa har qanday, xususan, jinoiy topshiriqlarni bajartirib kelgan.

Qayd etilishicha, kafening egasi telefon orqali 36 yoshli sudlanuvchidan yordam so‘rab, “Eddi” laqabli shaxs uning qarindoshidan pulini bo‘lib-bo‘lib berish sharti bilan 5 dona iPhone 11 Pro telefonini olib, muayyan miqdordagi pullarni to‘lagani va qolgan 4000 dollarni bermay yurganini aytgan. U esa “Eddi” bilan bog‘lanib, unga pullarni berishini tayinlagan hamda yordam so‘ragan shaxsdan buning evaziga 1500 dollarlik iPhone olib berishini aytgan.

Kafe egasi rad etgach, sudlanuvchi uni o‘zining choyxonasiga chaqirib, haqoratlaydi. Bunga javoban o‘zini xo‘rlangan deb hisoblagan shaxs “Shovotlandiya” kafesidagi o‘zining ofisiga sudlanuvchini chaqiradi. Ikki o‘rtada o‘zaro mojaro yuzaga keladi va kafe egasi xonadan chiqib ketadi. Tashqarida uni kutib turgan tanishlari esa sudlanuvchi va uning 2 nafar sherigi xonadaligini bilib turib, eshik va oynalarga tosh otadi.

36 yoshli sudlanuvchi va uning sheriklari voqea joyidan qochishga erishib, o‘zining choyxonasiga boradi va 26 yoshli sudlanuvchiga bo‘lgan voqealarni aytib, qasd olish rejasini tuzadi. Unga ko‘ra, “Shovotlandiya” egasi ofisda tunab qolgan vaqtda kafega o‘t qo‘yishga kelishib olishadi.

Sud hujjatlariga muvofiq, 36 yoshli sudlanuvchi o‘ziga “ishonchli alibi” shakllantirish uchun o‘zi doimiy yashagan xonadonda qoladi. 26 yoshli sudlanuvchi esa yarim tunda taksida kafega boradi va “Molotov kokteyli”ni tayyorlab, ularni kafening tez yonuvchi qismlariga uloqtiradi. Shundan so‘ng voqea joyidan yashirinadi.

Sud ma’lumotlariga ko‘ra, yong‘in oqibatida “Shovotlandiya” kafesining 644 million 799 ming 538 so‘mlik binosi hamda undagi 420,4 million so‘mlik oshxona jihozlari to‘liq yongan. Sud-tibbiy ekspertizasining xulosalariga ko‘ra, bino ichida uxlab yotgan ikki nafar ayol (1960-yilda tug‘ilgan), ikki nafar yigit (1998-yilda tug‘ilgan) va bir nafar qiz (1999-yilda tug‘ilgan) is gazidan zaharlanish fonida tananing 100 foiz 3—4-darajali termik kuyishi oqibatida vafot etgan.

Yong‘inga sababchi sifatida gumon qilingan fuqaro (1985-yilda tug‘ilgan) Jinoyat kodeksi 97-moddasi 2-qismining a, v, d, j, p bandlari (qasddan odam o‘ldirish), 165-moddasining 1-qismi (tovlamachilik), 173-moddasi 2-qismining b, v bandlarida (mulkni qasddan nobud qilish yoki unga zarar yetkazish) nazarda tutilgan jinoyatlarni sodir qilganlikda aybli deb topilgan.

Unga Jinoyat kodeksining 59-moddasi 4-qismi tartibida tayinlangan yengilroq jazolarni umrbod ozodlikdan mahrum qilish jazosi bilan qoplash orqali uzil-kesil umrbod ozodlikdan mahrum qilish jazosi tayinlangan.

Shuningdek, yana bir sudlanuvchi (1995-yilda tug‘ilgan) Jinoyat kodeksi 97-moddasi 2-qismining a, v, d, j, p bandlari (qasddan odam o‘ldirish), 173-moddasi 2-qismining b, v bandlarida (mulkni qasddan nobud qilish yoki unga zarar yetkazish) nazarda tutilgan jinoyatlarni sodir qilganlikda aybli deb topilgan. Jinoyat kodeksi 59-moddasining 4-qismi tartibida tayinlangan yengilroq jazolarni umrbod ozodlikdan mahrum qilish jazosi bilan qoplash orqali uzil-kesil umrbod ozodlikdan mahrum qilish jazosi tayinlangan.

Shuningdek, unga (1985-yilda tug‘ilgan fuqaroga — tah.) JIB Yakkasaroy tuman sudining 2014-yil 11-iyuldagi hukmi bilan tayinlangan jazoning o‘talmagan muddati qo‘shilib, yengilroq jazoni umrbod ozodlikdan mahrum qilish jazosi bilan qoplash orqali uzil-kesil umrbod ozodlikdan mahrum qilish jazosi tayinlangan.

Sud hukmi e’lon qilingan kundan 20 kun o‘tib kuchga kiradi.

Izoh
Asosiy yangiliklar
Dunyo
Yevropa gaz iste’molini kamaytirmoqda
Mahalliy
Toshkentda yong‘in oqibatida 2 kishi halok bo‘ldi (video)
Dunyo
Ukraina 2 ta aerodromga dronlar bilan zarba berishga urindi — Rossiya Mudofaa vazirligi