Samarqand viloyati Oqdaryo tumanidagi oshxonada 19-dekabr kuni gaz balloni portlab, oqibatda 10 kishi jarohatlangani, holat yuzasidan jinoyat ishi qo‘zg‘atilgani haqida xabar berilgan edi. “Daryo” muxbiri holatga guvoh bo‘lgan fuqarolar bilan suhbatlashib, voqea joyidan reportaj tayyorladi.

Voqea guvohlaridan biri Azamat Hasanovning ma’lum qilishicha, oshxonadagi gaz balloni gipsokarton bilan o‘ralgan maxsus joyda bo‘lgan. Uning yonida omborxona bo‘lgan. Shuningdek, oshxonaga chiqadigan eshik va qolipli non (buxanka) ishlab chiqarish sexi bo‘lgan.

“Nechta gaz ballon borligini bilmayman. Faqat gaz ballon joylashgan joy gipsokarton bilan yopilgandi. Uning yonida bitta karavot bor edi. Jabrlanganlar haqida eshitganim yo‘q”, — deydi Azamat Hasanov.

Yana bir guvoh Bahrom Umurqulovning ta’kidlashicha, voqea sodir bo‘lganda u shu yerda bo‘lgan. Tog‘asining o‘g‘li Davlatbek orqa taraflari kuygan holda chiqqan.

“Soat 14:10 atrofida mana shu ‘pirashka xona’dagi gazballon portladi. Ular gaz ballonning tagiga sham yoqqan. Sham qizib portlab ketgan va gaz ballon o‘rtasidan yorilgan. Birinchisi paqillab ketib, yong‘in bo‘ldi. Yong‘in bo‘lganidan keyin ikkinchisi ham portlab ketdi”, — deydi Bahrom Umurqulov.

“Bu yerda devorni (gaz ballon o‘ralgan joyni nazarda tutmoqda — tah.) o‘rniga gipsokarton qo‘yilgan. Portlash natijasida u yo‘q bo‘lib ketgan. Bu yerdagi omborxonada tog‘amning oziq-ovqat mahsulotlari bor edi. Hamma narsasi yonib ketgan. Qo‘ldan kelgancha yordam qilib hamma narsasini chiqarishga harakat qildik”, — deb qo‘shimcha qilgan u.

Portlash sodir bo‘lganidan so‘ng soat taxminan 14:30 atrofida 3 nafar ayolga yordam bergan Niyozxon Tursunovning aytishicha, olovda yonib ketayotgan ayolni ko‘rib, unga yordam bergan.

“O‘zim taksi haydayman. Soat 14:30 atrofida voqea bo‘lgan joyda turgandim. Bir ayol kishi xalatda yonib kelayotganini ko‘rdim. Xalatini yechib, ayolni qutqardim. Keyin yana bir ayol kishi baqirib keldi. Unga ham yordam berdim. O‘chirishda qo‘llari kuyib qoldi. Bularni qutqarganimdan so‘ng men ham ketdim. Shundan keyin nima bo‘lganini bilmayman. Men uchinchi ayolga yordam berganimdan so‘ng ketdim. Undan keyin kimlar qoldi, kimlar qolmadi bilmayman”, — deydi Niyozxon Tursunov.

Voqeaning yana bir guvohlaridan biri Bekzod Bekmatovning aytishicha, portlashdan so‘ng baqir-chaqir bo‘layotganini ko‘rgan.

“Bozor tomondan kelayotgan edim. Baqir-chaqir bo‘layotgandi. Shunga kelib qaradim. Voqea joyiga kirmadim, qo‘rqdim. Ichkaridan 15-20 nafar odam chiqdi adashmasam”, — deydi Bekzod Bekmatov.

Oqdaryo tuman tibbiyot birlashmasining shoshilinch tez tibbiy yordam bo‘limi shifokorining “Daryo” muxbiriga ma’lum qilishicha, portlash natijasida jabrlanganlarga dastlab shu yerda birinchi yordamni ko‘rsatishgan. So‘ng respublika shoshilinch tez tibbiy yordam ilmiy markazi Samarqand filialining kombustiologiya bo‘limiga joylashtirilgan.