Tokio Olimpiadasi g‘olibi Akbar Jo‘rayev og‘ir atletika bo‘yicha jahon chempioniga aylandi, Ruslan Nuriddinov kumush medalga ega chiqdi

Toshkent shahrida o‘tkazilayotgan og‘ir atletika bo‘yicha Jahon chempionatida 16-dekabr, payshanba kuni -109 kilogramm vazn toifasidagi sportchilar o‘rtasida bellashuvlar bo‘lib o‘tdi.

Unda so‘nggi ikki Olimpiadaning chempion va rekordchilari Ruslan Nuriddinov hamda Akbar Jo‘rayev ishtirok etdi.

Dast ko‘tarish bo‘yicha Ruslan Nuriddinov uchta urinishdan bittasini ko‘tarishga muvaffaq bo‘ldi va 185 kg bilan bronza medalini qo‘lga kiritdi. Tokio Olimpiadasida oltin medalni qo‘lga kiritgan Akbar Jo‘rayev uchala urinishni ham muvaffaqiyatli yakunlab, 195 kg natija bilan birinchi o‘rinni egalladi. Kumush medal esa 188 kg natija qayd etgan armanistonlik Simon Martirosyanga nasib etdi.

Dast ko‘tarish bo‘yicha eng yaxshi natija egalari:

1. Akbar Jo‘rayev (O‘zbekiston) — 195 kg;
2. Simon Martirosyan (Armaniston) — 188 kg;
3. Ruslan Nuriddinov (O‘zbekiston) — 185 kg.

Siltab ko‘tarish bo‘yicha ham birinchi o‘rin Akbar Jo‘rayevga nasib etdi. Akbar 226, 232, 236 kg toshni ko‘tardi. Kumush medali sohibi Ruslan Nuriddinov esa uchta urinishdan ikkitasini ko‘tara oldi (227 , 236 kg). Uchinchi o‘rinni Simon Martirosyan egalladi. Armanistonlik sportchi 228 kg natija qayd etdi.

Siltab ko‘tarish bo‘yicha eng yaxshi natija egalari:

1. Akbar Jo‘rayev (O‘zbekiston) — 238 kg;
2. Ruslan Nuriddinov (O‘zbekiston) — 236 kg;
3. Simon Martirosyan (Armaniston) — 228 kg.

Umumiy natijalar bo‘yicha Akbar Jo‘rayev 433 kg bilan oltin medalga ega chiqdi. Ruslan Nuriddinov 421 kg natija qayd etib, kumush medal sohibiga aylandi. Armanistonlik sportchi Simon Martirosyan 416 kg bilan bronza medalini qo‘lga kiritdi.

Umumiy natijalar: 

1. Akbar Jo‘rayev (O‘bekiston) – 433 (195+238) kg
2. Ruslan Nuriddinov (O‘zbekiston) – 421 (185+236) kg
3. Simon Martirosyan (Armaniston) – 416 (188+228) kg

Shu tariqa Akbar uchta yo‘nalishda ham oltin medaliga ega chiqdi. Eslatib o‘tamiz, Akbar Jo‘rayev Tokio—2020 Olimpiadasida 430 kilogrammni bo‘ysundirib, oltin medalga sazovor bo‘lgandi.