Toshkent viloyatida “Diplomatlar bog‘i” tashkil etildi. Abdulaziz Komilov va elchilar daraxt ekdi

Shavkat Mirziyoyev tashabbusi bilan qabul qilingan “Yashil makon” milliy dasturini amalga oshirish doirasida Tashqi ishlar vazirligi tomonidan Toshkent viloyatidagi “Amirsoy” tog‘-chang‘i majmuasi hududida “Diplomatlar bog‘i”ni tashkil etish masalasi ishlab chiqildi, deb xabar bermoqda vazirlik matbuot xizmati.

Qayd etilishicha, 10-dekabr kuni TIV rahbariyati, xorijiy davlatlarning Toshkent shahrida akkreditatsiyadan o‘tgan diplomatik muassasalari va xalqaro tashkilotlar vakolatxonalari rahbarlari ishtirokida ko‘chat o‘tqazish marosimi bo‘lib o‘tdi.

“Tadbirda xorijlik ishtirokchilar tomonidan O‘zbekistonda tabiatni muhofaza qilishni kuchaytirish, biologik xilma-xillikni saqlash va yashil hududlarni ko‘paytirish borasida amalga oshirilayotgan ishlar yuksak baholandi”, — deyiladi vazirlik xabarida.

Xabarga ko‘ra, bundan bir kun oldin TIV rahbariyati, xorijiy davlatlarning Toshkentda akkreditatsiyadan o‘tgan diplomatik muassasalari va xalqaro tashkilotlar vakolatxonalari rahbarlari ishtirokida davra suhbati bo‘lib o‘tdi.

Tadbirda xalqaro maydonda O‘zbekistonning yangi qiyofasini shakllantirishning konseptual masalalari yuzasidan atroflicha fikr almashilgan, mamlakat tashqi siyosiy faoliyatining zamonaviy yo‘nalishlari va asosiy ustuvorliklari, shuningdek, so‘nggi yillarda tashqi siyosat sohasida amalga oshirilgan ishlar yakunlari va natijalari muhokama qilingan.