Toshkent shahrida 2021-yilning 1-yanvaridan 30-noyabrigacha bo‘lgan vaqt oralig‘ida piyodalar ishtirokida 524 yo‘l-transport hodisasi sodir bo‘lgan. Bu haqda shahar Ichki ishlar bosh boshqarmasi xabar qildi.
Ma’lum qilinishicha, yanvar—noyabr oylarida poytaxtda sodir bo‘lgan YTHlar oqibatida 32 kishi olgan tan jarohatlari tufayli halok bo‘lgan. Yana 487 kishiga turli og‘irlikdagi badan shikastlari yetgan.
“Bu kabi fojialar har doim ham haydovchilar aybi bilan sodir bo‘lmaydi: ba’zida piyodaning o‘zi belgilangan qoidalarni buzib, yo‘lda kutilmagan omilga aylanmoqda”, — deyiladi IIBB xabarida.
Qayd etilishicha, 2021-yil 11 oyi davomida yo‘l harakati qoidalarini buzgan piyodalarga nisbatan jami 101 ming 861 ta ma’muriy bayonnoma rasmiylashtirilgan.
Eslatib o‘tamiz, 7-oktabr kuni O‘zbekistonda 2021-yil boshidan beri sodir bo‘lgan YTHlar oqibatida 1682 kishi halok bo‘lgani ma’lum qilingan. Jarohat olganlar soni esa 5920 tani tashkil etadi. Yo‘l-transport hodisalarining deyarli 40 foizi tezlikni me’yoridan oshirish oqibatida yuzaga kelgan.
Izoh (0)