“Metrotelekom”da texnik uzilishlar tufayli Toshkent metropolitenining ayrim bekatlarida ATTO va Humo to‘lov kartalari ishlamayapti. Bu haqda metropoliten matbuot xizmati xabar berdi.
Shuningdek, metropoliten ushbu nosozlik tufayli metro yo‘lovchilaridan uzr so‘ragan.
ATTO kompaniyasining ma’lum qilishicha, ATTO kompaniyasining ma’lum qilishicha, metroda internet ishlashini ta’minlaydigan yagona provayder Independent Telecom interneti ishlamay qolgan va hozirda tegishli idoralar bilan birgalikda yuzaga kelgan nosozlikni bartaraf etish choralari ko‘rilmoqda. “Yaqin vaqtda tizim qayta tiklanadi”, — deya qayd etadi kompaniya.
“Hamid Olimjon” metro bekati boshlig‘i Nozima Karimovaning “Daryo” muxbiriga aytishicha, nosozlik 15—20 daqiqa davom etgan, hozirgai vaqtda to‘lovlarni qilishda muammo yo‘q.
“Taxminan soat 08:00 da to‘lov kartalari orqali nosozliklar kuzatila boshladi. Bekatda Wi-Fi orqali to‘lovlar apparati (validator) mavjud. Biz shu orqali yo‘lovchilardan to‘lovlarni qabul qilib oldik. Texniklar uzilishlar internetdagi nosozlik tufayli bo‘lganini aytishdi”, — deydi bekat boshlig‘i.
O‘z navbatida ATTO kompaniyasi ham Toshkent metrosida avtomatlashtirilgan yo‘l haqi tizimi faoliyati qayta tiklanganini ma’lum qildi. “Internet xizmati qayta tiklandi va xizmat muntazam ravishda ishlamoqda. Hozirgi vaqtda ATTO transport kartasi yoki Humo kartasi bilan barcha metro bekatlarida to‘lov amalga oshirishingiz mumkin”, — deyiladi xabarda.
Eslatib o‘tamiz, Toshkent shahar jamoat transporti — avtobus va metropoliten yo‘nalishlarida avtomatlashtirilgan to‘lov tizimini joriy etish ishlari 2021-yil 1-yanvadan boshlangan. ATTO operatori tomonidan taqdim etilgan imtiyozli (talaba, ijtimoiy, o‘quvchi) transport kartalari esa 2021-yil 1-yanvardan boshlab amalga kiritildi.
Izoh (0)