Namanganda tuman soliq inspeksiyasi boshlig‘i 15 ming dollar pora olayotganida ushlandi

Namangan viloyatidagi tumanlardan birining davlat soliq inspeksiyasi boshlig‘i pora bilan ushlandi. Bu haqda Davlat xavfsizlik xizmati xabar berdi.

Namangan viloyatidagi tumanlardan birining davlat soliq inspeksiyasi boshlig‘i o‘zining haydovchisi nomida bo‘lgan sabzavotchilikka ixtisoslashgan fermer xo‘jalikning 1 gektar yer maydonini boshqa bir fuqaro nomiga rasmiylashtirib berish evaziga 15 ming dollar talab qilgan.

DXXning Namangan viloyati bo‘yicha boshqarmasi, viloyat prokuraturasi va iqtisodiy jinoyatlarga qarshi kurashish departamentining hududiy boshqarmasi xodimlari tomonidan o‘tkazilgan tezkor tadbirda, u so‘ralgan pulni xizmat xonasida olgan vaqtida ashyoviy dalillar bilan ushlangan.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

Eslatib o‘tamiz, may oyida Toshkentning Yunusobod tumani davlat soliq inspeksiyasi katta inspektori 3,5 ming dollar pora bilan ushlangandi.