Qashqadaryoda Mahalla va oilani qo‘llab-quvvatlash vazirligi hamda Yoshlar ishlari agentligining viloyat mas’ullari “ayollar daftari” va “yoshlar daftari”dagilarga kredit ajratishda ko‘zbo‘yamachilikka yo‘l qo‘ygan. Bu haqda viloyat hokimligi axborot xizmati rahbari Ahror Sodiqovga tayanib, “Daryo” muxbiri xabar berdi.
Ma’lum qilinishicha, 2021-yilning 31-oktabr holatiga ko‘ra, viloyatda “yoshlar daftari”ga kiritilgan 48 797 nafar yoshdan 46 572 nafari, shundan 4 949 nafari imtiyozli kreditlar ajratilgani evaziga daftardan chiqarilgan. Haqiqiy holat o‘rganilganda esa kredit olgani aytilgan 4949 nafar yoshdan 588 nafariga aslida kredit ajratilmagani ma’lum bo‘lgan.
“Yakkabog‘ tumanida yashovchi 10 nafar yosh bilan telefon orqali suhbatlashilganda 3 nafari kredit olish uchun murojaat qilmagani, 1 nafari murojaat qilgan bo‘lsa-da, ijobiy hal etilmagani ma’lum bo‘ldi. Misol uchun, Yakkabog‘ tumani ‘Mustaqillik’ mahallasida yashovchi Sh.Ochilov tomonidan tijorat banklariga murojaat qilinmagan bo‘lsa-da, yoshlar agentligining viloyat boshqarmasi tomonidan taqdim etilgan ma’lumotlarda ‘kredit ajratilgan’ deb ko‘rsatilgan”, — deyiladi Ahror Sodiqovning OAV vakillariga taqdim etgan ma’lumotida.
Zoir Mirzayevning matbuot kotibi taqdim etgan ma’lumotda hududda “ayollar daftari” bo‘yicha ham ishlar qoniqarsiz tashkil etilgani oydinlashgan.
Qayd etilishicha, 2021-yilning 1-noyabr kuni Mahalla va oilani qo‘llab-quvvatlash boshqarmasi tomonidan taqdim etilgan elektron ma’lumot va Markaziy bankning elektron bazasi solishtirilganida kreditlar ijobiy hal etildi deb ko‘rsatilgan 1340 ta holatda yolg‘on ma’lumot berilgani ma’lum bo‘lgan.
“250 nafar ayol bilan telefon orqali gaplashilganda ularning 63 nafari kredit olish uchun murojaat qilmagani ma’lum bo‘ldi. Qarshi tumani birinchi sektordagi Sh.Ruhutdinova, Qamashi tumani ikkinchi sektor hududidagi M.Bobodo‘stova tomonidan kredit olish uchun murojaat qilinmagan bo‘lsa-da, mahalla va oilalarni qo‘llab quvvatlash boshqarmasi tomonidan taqdim etilgan elektron ma’lumotda ularning murojaati ‘ijobiy hal etildi’ deb ko‘rsatilgan”, — deyiladi ma’lumotda.
Avvalroq Dehqonobodda “ayollar daftari” va “yoshlar daftari”ga kiritilgan fuqarolarga 216 ta tikuv mashinasi berilgani, O‘zbekistonda “ayollar daftari” va “temir daftar”ga kirgan oilalarning farzandlari bepul operatsiya qilinishi, Shavkat Mirziyoyev “Yoshlar daftari” orqali o‘z ishini boshlagan Aziza Samig‘ovaga 3 xonali uy sovg‘a qilgani to‘g‘risida xabar berilgandi.
Izoh (0)