Зангиотада онасига тазйиқ ўтказиб, уйида жанжал кўтарган шахс унга нисбатан ИИБ ходимлари куч ишлатганини айтаётгани тўғрисида хабар берилганди. Ички ишлар вазирлиги матбуот котиби Шоҳрух Ғиёсов ўзининг Telegram-каналида аслида ҳолат қандай бўлгани юзасидан тайёрланган видеолавҳани эълон қилди.
Маълум қилинишича, 9 ноябрь куни соат 20:00 ларда ушбу фуқаронинг онаси туман ИИБга мурожаат қилиб, ўғли мунтазам равишда спиртли ичимликлар истеъмол қилиши ва айни дамда ҳам маст ҳолатда жанжал кўтараётганини билдирган.
«Бу (ўғли — таҳр.) яна ичкиликка кириб, тўрт кундан буён тўполон. Мен нотинчман, уйда ётиғли бўлиб қолганман… Кеча ҳам қиёмат тўполон қилган», — дея мурожаат қилган аёл.
Онанинг сўзларига кўра, У.М. исмли ўғли масжидда қоровулликдан бўшаб, яна спиртли ичимликка ружу қўйган ва уйда жанжал чиқаришни бошлаган. Ушбу хабарга асосан тунги хизматга бириктирилган ИИО ходимлари воқеа жойига етиб борганида фуқаро У.М. маст ҳолатда бақир-чақир қилиб, оила аъзолари ва атрофдагиларни безовта қилаётганига гувоҳ бўлган.
«Мен у пайтда ўзимда бўлмаганман. Нима деганим, ички ишлар ходимларини сўкканманми, бошқа қилганманми, билмайман», — дейди фуқаро.
Туман ички ишлар биносида калтакланганини айтган фуқаро тиббий кўрикдан ўтказилган. Зангиота тумани Тез тиббий ёрдам бўлимининг маълумотномасига кўра, унда мастлик ҳолати ва чап кўзида шилиниш жароҳати борлиги маълум қилинган.
Аввалроқ эълон қилинган хабарда фуқаро У.М. ўзига нисбатан баённома расмийлаштирилаётганида ИИБнинг маъмурий биносидан қочиб кетиб, гўёки унга нисбатан куч ишлатилгани ҳақида ёлғон маълумотларни тарқатгани айтилганди. Унга нисбатан содир этган маъмурий ҳуқуқбузарликларига қўшимча равишда Маъмурий жавобгарлик тўғрисидаги кодекснинг 40-моддаси (туҳмат) билан материаллар расмийлаштирилиб судга тақдим этилган.
Изоҳ (0)