Aktrisa Elmira Rahimjonova “Daryo”ga intervyu berdi. “Charxpalak” serialidagi lo‘li Maryam obrazi bilan elga tanilgan aktrisa intervyu davomida undan rolini olib qo‘yishganida betob bo‘lib qolgani, hamma aktrisalar badavlat emasligi hamda rejissorlar bilan ko‘pincha nima sababdan tortishishi haqida gapirdi.

Foto: “Daryo”

— Bu savolni ko‘p marta berishgan. Ammo hamisha aniq sababini bilmasligimni aytganman. Yaratganning o‘zi kechirsin-u, avvaldan bizda rejissor o‘zlarini Xudo deb bilishardi. Hozirgidek, rejissorlar bilan o‘z do‘stidek salom-alik qilinmasdi. Ularga aktyorlarning  hurmati, e’tibori nihoyatda yuqori bo‘lgan.

“Charxpalak” serialining birinchi mavsumidan keyin meni Sobir Nazarmuhammedov rejissorligidagi “Chayongul” filmiga taklif qilishdi. U plyonkaga muhrlanadigan film bo‘lgani uchun taklifni rad etolmadim. Rahmatli “Charxpalak” seriali rejissori Shavkat Junaydullayevning yoniga borib: “Katta kinoga chaqirishdi, meni plyonkaga olishar ekan. Ruxsat bering bir oyda qaytib kelaman”, deganimda rozi bo‘lgandi. Lekin men o‘shanda rejissorning nafsoniyatiga tegib qo‘yganimni bilmagandim. “Chayongul” filmining suratga olish ishlaridan qaytganimdan so‘ng lo‘li Maryam roli boshqa aktrisaga berilganini aytishdi. Roldan chetlatilishimga ayrimlar o‘ylagandek gonorar sabab bo‘lmagan.

Rolimni qizg‘onganimdan bir hafta kasal bo‘lib qolganman. Chunki rolni yaratish uchun borimni bergandim. Undan ayrilish menga og‘ir botgan.

Bundan tashqari, aktrisa nega keyingi paytlarda saviyasi u qadar yuqori bo‘lmagan seriallarda suratga tushayotgani haqidagi savolga quyidagicha javob berdi.

— Karantindan keyin iqtisodiy jihatdan qiynalib qoldim. Shu bois chap-o‘ng oyoqni tashlab bo‘lsa-da, seriallarda suratga tushishga majbur bo‘lyapman. Chunki biz ham bola-chaqamizni ob-havoga boqmaymiz-ku?! “O‘zbekkino” va O‘zbekiston Respublikasi Madaniyat vazirligi balki aktyor va aktrisalarning yashash sharoiti haqida boshqacha tasavvurga egadir yoki ular faqat yaxshi yashaydigan aktyorlarni ko‘rishgandir. Ammo hammada sharoit bir xil emas.

Aktyor necha yil ishlashidan qat’i nazar u yashashi, bola-chaqasini boqishi kerak. Keyingi paytlarda “Aktyorlik kasb emas, hobbi bo‘lishi kerak. Har bir artistning hech bo‘lmaganda bitta restorani yoki do‘koni bo‘lishi kerak”, — degan gaplarni ham eshityapmiz. Baraka topgurlar, biz hali u darajaga yetganimiz yo‘q, — deydi aktrisa.

Shuningdek, aktrisa hozirgi rejissor va prodyuserlar bilan nima uchun tortishishi haqida ham gapirdi.

— Aslida hammasiga o‘zim aybdorman. Ba’zan o‘z prinsplarimdan voz kechganim uchun o‘zimni koyiyman.

Aktyor gonorar haqini aytishi bilan prodyuser yig‘lashni boshlaydi. Budjeti kamligini bilib, insoniylik yuzasidan rozi bo‘lasiz. Ammo ularni aktyorning sog‘lig‘i, qorni och-to‘qligi yoki rol uchun kiyimlari bor yo‘qligi qiziqtirmaydi. Bir epizod suratga olingandan keyin aktrisa dam olishi kerak, desangiz ko‘ziga yomon ko‘rinasiz. Axir biz ham odammiz, ammo ular ertaga kamroq xarajat qilish uchun 20 ta epizodni bir kunda olishga harakat qilishadi. Bu juda yomon va achinarli hol. Shu bois keyingi paytlarda pulingiz ham kerakmas, rolga chaqirmanglar, deydigan bo‘lganman, — deydi aktrisa Elmira Rahimjonova.

Elmira Rahimjonova bilan intervyuni to‘liqligicha quyida tomosha qilishingiz mumkin.