O‘zbekistonda xizmat ko‘rsatgan artist Dilorom Egamberdiyeva 25-oktabr kuni muborak 59 yoshga to‘ldi. “Kelinlar qo‘zg‘oloni”, “Temir xotin”, “Armon” kabi ko‘plab filmlardagi betakror rollari bilan tanilgan aktrisa har doim yosh va xushbichim ko‘rinadi. Quyida jurnalistlarga deyarli intervyu bermaydigan Dilorom Egamberdiyeva haqida so‘z yuritamiz.
Farg‘ona vodiysidan Moskvaga...
Dilorom Egamberdiyeva 1962-yili Farg‘ona viloyatida tug‘ilgan. Maktabda o‘qib yurgan davrida Moskvadagi Butunrossiya davlat kinematografiya instituti (VGIK)da o‘qish uchun iqtidorli yoshlar orasidan tanlab olinadi. U 9-sinfni tamomlab, Rossiyaga ketadi va oliy o‘quv yurtida Boris Chirkovning aktyorlik kurslarida o‘qiydi.
Talabalik paytidanoq kino olamiga kirib kelgan aktrisa debyut rolini 1981-yil suratga olingan “Oltin jun” filmida o‘ynaydi. Zuhra ismli tarjimon qiz ijrosi unga ketma-ket loyihalar uchun eshik ochadi. 1983-yilda “Uyg‘onish” va “Yolg‘iz” kinolarida ishtirok etadi.
To‘qqiz yil umrini bilim olish maqsadida Moskvada o‘tkazgan Dilorom 1983-yili institutni bitiradi va O‘zbekistonga qaytadi.
Mashhurlik olib kelgan “Kelinlar qo‘zg‘oloni”
Ona yurtiga qaytgan Dilorom o‘z mehnat faoliyatini “O‘zbekfilm” kinostudiyasida boshlaydi. 1984-yili Melis Abzalov rejissorligidagi “Kelinlar qo‘zg‘oloni” badiiy filmida qatnashadi. Kartina 1985-yili ekran yuzini ko‘rgach, u Nigora roli bilan xalqqa taniladi.
“Syomka jarayonida Dilbar opa Ikromova bilan gapimiz gapimizga to‘g‘ri kelib, juda ahil bo‘lib ketgandik. Bo‘sh qoldik deguncha bir chekkaga o‘tib olib, gapdan bo‘shamasdik. To hay-haylab chaqirishmaguncha boshqa narsa bilan ishimiz bo‘lmasdi.
Butun boshli qozon ag‘darilib, sho‘rva yer bilan bitta bo‘libdi-yu, biz bilmabmiz. Suratga olish boshlanganida sinchiklab qarasam, kosada loy, tosh, go‘sht, kartoshka hammasi bor. Qozon ag‘darilganda yerdan sidirib, barchasi aralash-quralash qaytarib olingan-da! O‘shanda sho‘rvani hech qaysimiz ichmay, o‘zimizni huddi sho‘rva ichayotganday qilib ko‘rsatganmiz.
Raqs sahnasiga esa aerobikani taklif qilganman. O‘sha paytlarda hali aerobika bizgacha yetib kelmagandi. Men yaqindagina Moskvadan o‘qishdan qaytgan paytim, u yerda aerobikaga qatnashgandim. Ko‘rasiz, rosa chiroyli chiqadi, shov-shuv bo‘ladi, deganman. Rejissor esa o‘ylab o‘tirmay, rozi bo‘lgan va undan haligacha minnatdorman. Uning o‘rnida boshqa rejissor bo‘lganida, badiiy kengash bilan maslahatlashib ko‘raman, degan bo‘lardi.
Bu sahna filmning eng chiroyli, eng kulgili sahnasi bo‘lgan. Toshkentda hali “gedri”lar yo‘q edi, men birinchi bo‘lib shu raqs sahnasida kiyganman. Belimga salom qiladigan ro‘molimni bog‘lab olgandim...”, — degan edi u intervyularining birida.
Muvaffaqiyat qozongan kinolar...
“Kelinlar qo‘zg‘oloni”dan keyin “Hujum”, “Poklanish” kabi bir qancha kinolarda suratga tushgan aktrisa 1987- yili “Armon” filmida Humor qiyofasini gavdalantiradi. Mazkur rol ham omadli chiqib, uning muxlislari safini yanada kengaytiradi. 1990-yili yaratilgan “Temir xotin”dagi Alomat obrazini yosh-u keksa birdek sevib ko‘radi.
Dilorom Egamberdiyevaning filmografiyasida muvafaqqiyatli kinolar talaygina. Aktrisa O‘zbekiston mustaqillikka erishganidan so‘ng ham ko‘plab kino va seriallarda turli xarakterdagi qahramonlarni talqin qiladi.
Xususan, “Yulduzingni ber osmon”, “Chol va nabira”, “O‘limdan keyingi hayot”, “Ko‘chaning quyoshli tomonida”, “Madina”, “Muhabbatimsan”, “Gulchatoy”, “Baron” kabi filmlarda suratga tushadi. Bundan tashqari, “Qozoqfilm” va “Tojikfilm” kinostudiyalarining qator loyihalarida ham o‘ziga xos rollar o‘ynaydi.
“Boriga shukr, yo‘g‘iga sabr qilaman”
1995-yilda “O‘zbekistonda xizmat ko‘rsatgan artist” unvoni bilan taqdirlangan Dilorom Egamberdiyeva televideniye va internet saytlaridagi loyihalarda deyarli ko‘rinish bermaydi.
U jurnalistlardan o‘zini olib qochadi, turli tadbir va festivallarda ham OAV vakillarining savollariga javob bermaydi. Shu bois uning bolaligi, ijodiy faoliyati va hayoti to‘g‘risida ma’lumotlar juda kam.
Dilorom Egamberdiyeva 1990-yilda turmushga chiqqan va qiz farzand ko‘rgan. Umr yo‘ldoshi erta vafot etgan. U qizini turmushga uzatgach, jiyani bilan birga yashaydi. Ammo aktrisaning shaxsiy hayoti har doim omma uchun sirli bo‘lib kelgan.
U intervyularining birida “Bosib o‘tgan yo‘lingizdan qoniqasizmi?”, degan savolga shunday javob bergan:
“Hayotdan ko‘p narsa istaymiz. Lekin men boriga shukr, yo‘g‘iga sabr qiladigan insonman. Boshqalarning hayotida sodir bo‘layotgan ishlarga bir e’tibor qiling: g‘iybatlarga quloq tutmang, bemorlarni, nogiron bolalarni kuzating. Naqadar ayanchli...
Hayit arafasida onamning qabrini ziyorat qilgani bordik, qo‘yilganlariga chamasi ikki oycha bo‘lgandi. Shu vaqt mobaynida qabrlar oltmish bittaga ko‘payibdi... Muzlab ketdim. Qanchalik og‘ir bo‘lmasin, shukronalik hissi bilan yashash uchun ba’zan shunday joylarga borib turish kerak, shekilli...”
Aktrisa bugungi kunda ham faoliyatini Toshkentda davom ettirib, film va seriallarda suratga tushmoqda, kino sohasiga oid tadbirlarda ishtirok etmoqda.
Mirolim Isajonov tayyorladi
Izoh (0)