O‘ziga xos ovoz egasi va ijodda yangiliklar yaratishdan charchamaydigan xonanda Munisa Rizayeva bugun, 21-oktabr kuni o‘zining 35 yoshini qarshilamoqda. Quyida taniqli qo‘shiqchining hayoti va ijod yo‘li haqida hikoya qilamiz.
Huquqshunos va shifokorlar avlodi
Xonanda Munisa Rizayeva 1986-yili Toshkent shahrida ziyolilar oilasida tug‘ilgan. Bobosi, ya’ni onasining otasi huquqshunos bo‘lib, respublika bosh prokuraturasida yuqori lavozimlarda faoliyat yuritgan. Buvisi esa shifokor bo‘lgan. Tog‘a va xolalari ham ota-onasining izidan borib, huquqshunos va sog‘liqni saqlash xodimi sifatida mehnat qiladi. Munisaning volidasi Dilorom Bo‘rijo‘rayeva ham shifokor, dadasi esa tadbirkor.
Munisa kichkinaligidan qo‘shiq aytib, raqs tushishni yaxshi ko‘rgani bois kelajakda yulduz bo‘lishni orzu qiladi. Qizidagi iste’dod va qiziqishni ko‘rgan onasi uni taniqli raqqosa, O‘zbekiston xalq artisti Malika Ahmedovaga shogirdlikka beradi. Qizaloq ma’lum vaqt raqs to‘garagiga qatnaydi. Keyinroq fortepiano bo‘yicha malakali pedagogdan ta’lim ham oladi.
Ammo Munisaning dadasi ajdodlari orasida umuman san’at vakili yo‘qligini ro‘kach qilib, farzandining bu tanloviga qarshi chiqadi.
Shunga qaramay, Dilorom Bo‘rijo‘rayeva qizini qo‘llab-quvvatlashda davom etadi. Ona-bola besh-olti yil davomida bo‘lajak mashhur qo‘shiqchining xatti-harakatlarini oila boshiga turli bahonalarni aytib, yashirib yurishadi.
Angliyadagi ikkita OTM talabasi
Munisaning volidasi qizi qachonlardir taniqli va sevimli san’atkor bo‘lishiga ishonib, uni studiyalarga, teleradiokanallar va turli tanlovlarga olib boradi.
Maktabda o‘qib yurgan paytlari Munisa oilasi bilan Londonga ko‘chib ketadi. Uning musiqaga bo‘lgan muhabbatini ko‘rgan dadasi oxiri san’at yo‘nalishida bilim olishiga rozi bo‘ladi. Munisa Yevropada o‘rta ta’limni olgach, Angliya davlat konservatoriyasida o‘qiydi. Keyinroq mehmonxona tijorati va turizm yo‘nalishi bo‘yicha ham tahsil olib, oliy ma’lumot diplomini qo‘lga kiritadi.
“Mening muvaffaqiyatim — bu shunchaki omad emas, bu mehnatim mevasi.
Taniqli xonanda bo‘lish va xalqning hurmatiga sazovor bo‘lish istagi meni qamrab olgan edi. Men orzum yo‘lida har qanday to‘siqlarni yengib o‘tishga tayyor edim. Ota-onam musiqaga bo‘lgan qarashim jiddiyligini, o‘z qarorimdan qaytmasligimni ko‘rgach, musiqa maktabiga, so‘ngra oliy o‘quv yurtiga borishimni maslahat berishdi.
“Kim bo‘lishingdan qat’iy nazar, o‘z sohangning mutaxassisi bo‘l, — deb otam aytgan edi, — avvalo, xohishing shunchaki injiqlik va xomxayol emasligini isbotla.Bu so‘zlar men uchun turtki bo‘ldi. London konservatoriyasiga qabul qilindim, sizga aytaman, bu oson bo‘lmagan. O‘qish davomida men e’tiborimni to‘liq ilm olishga, ko‘nikmalarni o‘zlashtirishga qaratdim. Ustozlarimning ko‘zlarida ijodimga nisbatan hayratni ko‘rish — bu mening mukofotim edi. Universitetni muvaffaqiyatli tugatgach, o‘zimni butunlay musiqaga bag‘ishladim.
2011-yilda men qayta tug‘ildim, chunki aynan shu yili xalq Munisa Rizayevani xonanda sifatida tan oldi. Bir zumda xitga aylangan birinchi repertuarim reytingimni oshirishga va qo‘shiqchilik faoliyatimni boshlashga sababchi bo‘ldi. Ko‘plab konsertlar, yangi qo‘shiqlar, spektakllar, shou-biznesga kirish — bularning barchasi qisqa vaqt ichida sodir bo‘ldi”, — deydi Munisa Rizayeva muvaffaqiyatga erishish uchun tinimsiz mehnat qilish kerakligini ta’kidlab.
“O‘n sakkiz yoshimdan to yigirma ikki yoshimgacha uchga bo‘linib harakat qilganman, desam ham bo‘ladi. O‘shanda rosa qiynalganman. Ikki yo‘nalish bo‘yicha o‘qish bilan bir qatorda, ishlaganman ham. Garchi otam ishlashimga ruxsat bermasalar-da, o‘z ahdimdan qaytmaganman, ishlab pul topishga ishtiyoqmand edim. Bu odatim haligacha saqlanib qolgan”, — degan edi u intervyularining birida.
Umrining o‘n yilcha davrini, aniqrog‘i, yoshligini Angliyada o‘tkazgan Munisa Rizayeva har gal O‘zbekistonga kelgan paytida qo‘shiqlar yozib, tanlovlarda ishtirok etadi.
2004-yili Toshkentda o‘tkazilgan “Umid yulduzlari” ko‘rik-tanlovida “Nega-nega” qo‘shig‘i bilan qatnashib, g‘oliblar safidan joy oladi. Shundan keyin u jiddiy ijod qilishga bel bog‘laydi.
Mashhurlik olib kelgan “Aha-oho”
Xonandaning 2008-yili “Ko‘zlarim yana” qo‘shig‘i va unga dengiz bo‘yida suratga olingan klip omadli chiqib, tinglovchilar e’tiboriga tushadi. U 2012-yili “Aha-oho” taronasi bilan o‘zbek shou-biznesida shuhrat qozonadi. Folklor va zamonaviy yo‘nalish uyg‘unlashgan mazkur tarona va uning videoklipi yosh-u keksaning tilidan tushmaydi.
Shundan so‘ng xonanda “Hollivud”, “Sekin-asta”, “Ey samo” singari ijod mahsullarini birin-ketin tinglovchilarga havola qiladi va barchasi xit darajasiga ko‘tariladi.
Munisa Rizayeva ilk bor 2010-yilda rejissor Yodgor Nosirovning “Hijron” filmida rol ijro etadi. “Firibgar”, “Hay-hay qizaloq”, “Aql va yurak”, “Salom, Natasha”, “Nafs” singari kinolardagi turli xarakterdagi rollari orqali aktrisa sifatida tomoshabinlar e’tiborini qozonadi.
Hamkasblari – Botir Qodirov, “Shod” va “Ummon” guruhlari yigitlari bilan kuylagan duetlari ham haligacha to‘y-u tadbirlarda talabgir.
Operatsiya...
Omma nazariga tushgan Munisa Rizayeva tashqi ko‘rinishiga e’tibor bera boshlaydi va 2014-yili burnini operatsiya qildiradi. U o‘z intervyusida bu haqda shunday deydi:
“Burnimning ustki qismidagi bo‘rtib chiqqan suyak ekranda va suratlarda biroz xunuk ko‘rinar edi. Ilgari klip va konsertlarni tasvirga olish ishlarida tasvirchilarimiz, montaj ustalari kerakli rakursda ishlay olmay juda qiynalishardi. Qolaversa, o‘zim ham ba’zida bundan biroz uyalardim. Bu noqulaylikdan biryo‘la qutilish uchun plastik jarrohlik qilishga ahd qildim. Bolaligimdan orzu qilgan ishimni amalga oshirdim. Menimcha, endi burnimning ko‘rinishi chakki emas”.
To‘rtta tilda erkin gaplashadi
O‘zbek estradasidagi yorqin ijodkor o‘zbek tilidan tashqari, rus, ingliz, fransuz va ispan tillarida ham erkin muloqot qiladi. Tojik tilida so‘zlashishga biroz qiynaladi.
“Vaqt topib, arab va xitoy tillarini ham o‘rganish rejamda bor. Bu ikki til har doim ommaviy muloqot vositasi hisoblangan. Shuningdek, Qur’oni Karimni ham, albatta, o‘rganmoqchiman”, — degan qo‘shiqchi.
Munisa Rizayeva tadbirkorlik faoliyatini ham yo‘lga qo‘ygan bo‘lib, poytaxtdagi mashhur mehmonxonalardan birini boshqaradi. U hatto ma’lum muddat o‘z mehmonxonasining o‘nta xonadan iborat beshinchi qavatida yashagan.
Mashinalarga qiziqish
Munisa Rizayeva avtomobillarga qiziqadi. U onasi, singlisiga ko‘pincha avtomobil sovg‘a qiladi. Xususan, yaqinda xonanda singlisi Karimaning tug‘ilgan kuniga Porsche Taycan avtomobilini hadya qildi. Uning o‘zi BMW X7 avtomobilini boshqaradi. Xonanda bir oy avval Malibu avtomobilini ham xarid qildi.
“Birinchi mashina birinchi sevgiga o‘xshaydi. Nima bo‘lgan taqdirda ham, keyingi mashinani birinchisini sevganingiz kabi yaxshi ko‘rmaysiz, albatta, agar u BMW bo‘lmasa.
Birinchi marotaba rulga o‘tirganda boshdan kechirgan tuyg‘ularni tasvirlab bo‘lmaydi.
Men kichkinaligimdan mashina haydaganman, birinchisi ‘Jiguli’ bo‘lgan, unda men 13 yoshda edim. Keyin menga Matiz, undan keyin Nexia olib berishgan. Biroz vaqt o‘tgach, Nissan Qashqai’ni haydashni boshlaganman. Mercedes’ni sovg‘a sifatida otamdan olganman. Ushbu mashinalar mening xohishimga ko‘ra sotib olingan deb ayta olmayman, chunki ularni men tanlamaganman.
Birinchi bor o‘zim sotib olgan avtomobil – Mercedes edi. Men Mercedes’ni juda uzoq vaqt minib yurganman, turli xil markalarini, albatta, masalan: Mercedes 222, Mercedes GLE, Mercedes GLS.
Oxir-oqibat o‘sha unutilmas kun keldi – juda ikkilanib, BMW sotib olgan kun. To‘g‘risini aytsam, qilgan tanlovimdan hech ham afsuslanmayman. Chunki BMW shunchaki mashina emas, u har tomonlama mukammal ishlangan, katta tezlikda harakatlana oladigan zamonaviy avtoulovdir”, — deya hikoya qiladi xonanda.
Ikki marta to‘yi to‘xtatilgan
Oilada uch farzandning o‘rtanchasi bo‘lgan xonandaning opasi Kamola oilasi bilan Angliyada yashaydi. Singlisi Karima esa qo‘shiqchining yaqin yordamchisi.
Munisa Rizayeva 2014-yilda xonanda Jasur G‘oipov bilan turmush qurayotganini ma’lum qildi. Ammo ko‘pchilik kutgan bu to‘y bo‘lmadi. Xonandalar garchi taqdir yo‘llari bog‘lanmagan bo‘lsa-da, hozirgacha do‘stona munosabatni saqlab qolgan.
Munisa Rizayeva 2015-yilda tennischi Vaja Uzoqov bilan uchrasha boshlagan. Juftlik to‘ylariga bir necha oy qolganida tennischining xiyonati tufayli ajrashgan. “Qachon turmushga chiqasiz?” xonandaga Instagram orqali eng ko‘p beriladigan savol. Munisa Rizayeva ushbu savoldan charchagani bois ba‘zan muxlislariga yolg‘on gapirib ham turadi.
Masalan, u yil boshida ham muxlislariga turmushga chiqayotganini aytib, hazillashdi.
Bugungi kunda ham xit qo‘shiqlar yaratib, to‘y xizmatlarida reytingi baland bo‘lgan Munisa Rizayeva kuniga 8 tagacha to‘yga chiqadi va 24 soat ichida 8 ming dollar daromad topadi.
Xonanda Instagram sahifasini 2012-yilning may oyida ochgan bo‘lib, hozirda uning folloverlari 5 million nafarni tashkil etadi. U o‘z sahifasiga to‘qqiz yil davomida 4 mingdan ziyod suratlar va videolar joylagan.
2020-yildan boshlab O‘zbekiston Prezidenti va hukumat vakillari ishtirokidagi davlat tadbirlarida ham faol xizmat qilayotgan xonanda 2021-yil “Shuhrat” medali bilan taqdirlandi.
Muallif: Mirolim Isajonov
Izoh (0)