O‘zbekistonda profilaktika ishlari doirasida telekanallar faoliyati vaqtincha to‘xtatiladi, deya xabar qilmoqda Axborot texnologiyalari va kommunikatsiyalarini rivojlantirish vazirligi axborot xizmati.

Foto: “Daryo” / Madina Nurman

Ma’lum qilinishicha, O‘zbekiston aholisiga televideniye dasturlarini uzluksiz va sifatli tarqatilishini ta’minlash maqsadida Radioaloqa, radioeshittirishlar va televideniye markazi — “RRTM” Davlat unitar korxonasining texnik vositalarini yillik rejalarda belgilangan muddatlarda o‘chirib, profilaktika ishlari muntazam ravishda amalga oshiriladi.

Qayd etilishicha, “RRTM”ning raqamli teledasturlarni shakllantirish qurilmalarida, teleradio uzatgichlarida, antenna-fider tizimlarida va sun’iy yo‘ldosh qabul qilish-uzatish qurilmalarida profilaktika ishlari 2021-yilning 1–23-noyabr kunlari o‘tkaziladi.

Ma’lumotlarga ko‘ra, navbatdagi rejali profilaktika ishlari 1–23-noyabr kunlari jadval asosida har bir hududda navbatma-navbat tungi soat 1:00 dan 06:00 gacha teleuzatgichlarda profilaktika ishlari o‘tkazilishi rejalashtirilgan. Ushbu muddat oralig‘ida har bir hududda (Toshkent shahridan tashqari) faqat bir kun tungi soat 01:00 dan 06:00 gacha davlat va nodavlat telekanallarni efirga uzatilishi vaqtincha to‘xtatilishi mumkin.

Ta’kidlanishicha, to‘xtalishlar kuzatilgan vaqtda abonent uskunasi (tyuner va televizor) sozlamalarini o‘zgartirish tavsiya etilmaydi.