24-oktabr, yakshanba kuni O‘zbekiston prezidenti saylovi bo‘lib o‘tadi. Saylov kompaniyasi esa bundan uch oy avval — 23-iyul kuni start olgandi. Saylov kodeksining 44-moddasiga ko‘ra, saylov kuni va ovoz berishga bir kun qolganida tashviqotga yo‘l qo‘yilmaydi.
Foto: “Daryo” / Dilruh Isomiddinova
Tashviqotni saylovchilarga bepul yoki imtiyozli shartlarda tovarlar berish, xizmatlar ko‘rsatish (axborot xizmatlaridan tashqari), shuningdek, pul mablag‘lari to‘lash bilan qo‘shib olib borish, noto‘g‘ri axborotni, nomzodlarning sha’ni va qadr-qimmatiga putur yetkazadigan ma’lumotlarni tarqatish taqiqlanadi.
Quyidagilarning saylovoldi tashviqotini olib borishi taqiqlanadi:
- davlat hokimiyati va boshqaruvi organlari, mahalliy davlat hokimiyati organlari rahbarlarining;
- O‘zbekiston Qurolli Kuchlari harbiy xizmatchilarining, O‘zbekiston Respublikasi Davlat xavfsizlik xizmati, boshqa harbiylashtirilgan bo‘linmalar, huquqni muhofaza qiluvchi organlar xodimlarining, sudyalarning;
- saylov komissiyalari a’zolarining;
- diniy tashkilotlar professional xizmatchilarining;
- Davlat hokimiyati va boshqaruvi organlarining, mahalliy ijro etuvchi hokimiyat organlarining mansabdor shaxslariga o‘z mansab va xizmat mavqeyidan saylovoldi tashviqoti vaqtida har qanday siyosiy partiyaning yoki nomzodning foydasiga yoxud unga qarshi foydalanishi taqiqlanadi.
Shuningdek, 103-moddaga binoan, saylov kuni va ovoz berish boshlanishidan bir kun oldin jamoatchilik fikri so‘rovlari natijalarini, saylov natijalari prognozlarini, o‘tkazilayotgan saylov bilan bog‘liq boshqa tadqiqotlarni e’lon qilish (hammaga ma’lum qilish), shu jumladan, axborot tarmoqlariga, shuningdek, internetga joylashtirish taqiqlanadi.
Bloger va huquqshunos Xushnud Xudoyberdiyevning yozishicha, bu yerda gap ayni bir nomzodga ovoz berishga chorlash haqida ketmoqda. Saylovning o‘ziga oid boshqa xabarlar, shuningdek, barcha saylovchilarni saylovda faol ishtirok etishga chorlaydigan umumiy tashviqotga taqiq yo‘q, bunga ruxsat etiladi.
