Pul mukofoti bilan taqdirlangan sambochilar, OChLda tengsiz deb topilgan Masharipov va “Oltin to‘p” uchun tanlovini aytgan Zidan. Eng so‘nggi sport yangiliklari

Dunyo va o‘zbek sportiga oid 19-oktabr kunining eng muhim xabarlari dayjesti bilan tanishing.

O‘zbekiston

Jahon chempionatida 2-o‘rinni egallagan yosh sambochilarga pul mukofotlari topshirildi

Sambo bo‘yicha O‘zbekiston yoshlar va o‘smirlar terma jamoasi 15—17-oktabr kunlari Gretsiyaning Saloniki shahrida bo‘lib o‘tgan Jahon chempionatida umumjamoa hisobida ikkinchi o‘rinni egallagan sportchilarga pul mukofotlari topshirildi.

Turizm va sport vazirligi matbuot xizmatiga ko‘ra, jahon birinchiligida chempioni bo‘lgan sambochilar 10 million so‘m, kumush medal egalari 5 million so‘m, bronza medalini qo‘lga kiritganlar esa 3 million so‘m miqdoridagi mukofotga ega bo‘lgan.

O‘zbekiston milliy terma jamoasi Gruziya bilan o‘rtoqlik o‘yini o‘tkazadi

O‘zbekiston milliy terma jamoasi noyabr oyida Toshkent va Tbilisi shaharlarida o‘quv-mashg‘ulot yig‘ini o‘tkazadi. Ushbu yig‘in davomida Srechko Katanes shogirdlari Gruziya terma jamoasi bilan o‘rtoqlik uchrashuvida maydonga tushadi. Mazkur bahs 15-noyabr kuni 19:00 da Tbilisidagi “Boris Paichadze” stadionida bo‘lib o‘tadi.

Masharipov OChL chorak finalining eng yaxshi o‘yinchisi deb topildi

O‘zbekiston milliy terma jamoasi va “An-Nassr” klubi hujumkor yarim himoyachisi Jaloliddin Masharipov Osiyo Chempionlar Ligasi chorak finalining eng yaxshi futbolchisi deb topildi va ramziy terma jamoadan joy oldi.

Jaloliddin Masharipov to‘p suradigan “An-Nassr” jamoasi Chempionlar Ligasi chorak finalida BAAning “Al-Vahda” jamoasini 5:1 hisobida mag‘lub etib, yarim finalga yo‘l oldi. Masharipov uchrashuvda ikkita gol urdi va bitta golli uzatmani o‘z hisobiga yozdirib qo‘ydi.

Qayd etish kerak, “An-Nassr” OChL yarim finali doirasida “Al-Hilol”ga qarshi o‘ynaydi. Uchrashuv 19-oktabr kuni 23:00 da boshlanadi.

Superliga 23-turining ikkita o‘yinida VAR tizimi ishlaydi

Futbol bo‘yicha O‘zbekiston chempionatining 23-tur bahslari 21—25-oktabr kunlari bo‘lib o‘tadi. PFL mazkur bahslarda faoliyat olib boradigan hakamlar nomini e’lon qildi. Tur doirasidagi ikkita o‘yinda VAR tizimi ishlaydi: “Metallurg” — “OKMK”, “Bunyodkor” — “Turon”.

Jahon

Runi “Nyukasl”ni boshqarishga qiziqmoqda 

“Manchester Yunayted” va Angliya terma jamoasi sobiq hujumchisi Ueyn Runi saudiyaliklar qo‘liga o‘tgan “Nyukasl”ni boshqarishga qiziqmoqda.

ChronicleLive nashriga ko‘ra agar jamoaning ayni damdagi ustozi Stiv Bryus “Nyukasl”ni tark etsa, qisqa muddat davomida “qarg‘alar” boshqaruvini o‘z qo‘liga olishi tayyor.

Runi hozirda “Derbi Derbi”ni boshqarmoqda va moliyaviy muammolar tufayli istalgan vaqtda klubni tark etishi mumkin.

Lyakazett faoliyatidagi 200-golini urdi

“Arsenal” hujumchisi Aleksandr Lyakazett APL 8-turida “Kristal Pelas”ga qarshi o‘yinda (2:2) gol urdi.

Bu gol fransiyalik futboli uchun professional faoliyatidagi 200-gol bo‘ldi. Lyakazett shundan 129 tasini “Lion” safida urgan bo‘lsa, 68 tasi “Arsenal”dagi faoliyatiga to‘g‘ri keladi. Yana 3 ta golni esa Fransiya terma jamoasida urgan.

“Manchester Siti” Sterling uchun narx belgiladi

“Barselona” “Manchester Siti” vingeri Rahim Sterlingga qiziqish bildirayotgani haqida xabar berilgandi.

Marca nashriga ko‘ra, “Barselona”ga ushbu transferni amalga oshirish oson bo‘lmaydi. “Shaharliklar” futbolchisi uchun 80 million yevro (taxminan, 68 million funt) olmoqchi. Ushbu summa katalon klubi uchun og‘irlik qilishi mumkinligi aytilmoqda.

Avvalroq, “Barselona” Sterlingi qishda sotib olish majburiyati bilan ijaraga olmoqchiligi xabar qilingandi.

Zidan “Oltin to‘p”ni Benzemaga berishni taklif qildi

“Real” sobiq bosh murabbiyi Zinedin Zidan “Oltin to‘p”ni kim olishi kerakligi haqida o‘z fikrlari bilan o‘rtoqlashdi.

“Benzema ‘Oltin to‘p’ga loyiq. U ajoyib futbolchi va men unga murabbiylik qilish sharafiga muyassar bo‘lganman. U maydonda hamma narsa qila oladi. Karim juda yuqori darajali o‘yinchi, u mukofotlanadi deb umid qilaman. ‘Oltin to‘p’ni unga bergan bo‘lardim”, — deydi Zidan.