Жиноят ишлари бўйича Янгиҳаёт тумани судида уч кунлик чақалоғини сотишга уринган аёл устидан суд мажлиси бўлиб ўтди. Бу ҳақда «Ёшлар» телеканалининг «Янги давр» информацион дастурида маълум қилинди.
Маълум қилинишича, 1993 йили Андижон вилоятида туғилган, оилали Т. моддий манфаат учун 3 кунлик чақалоғини сотишга уринган вақтида Бош прокуратура ҳузуридаги департамент ва туман ИИБ ходимлари томонидан ашёвий далиллар билан қўлга олинган.
Маълумотларга кўра, судланувчи аёл бундан етти йил олдин 1987 йилда туғилган эркак билан шаръий никоҳдан ўтган ва у билан яшаб келган. Икки нафар фарзанди дунёга келгач, улар қонуний никоҳдан ўтган, аммо оилавий можаролар сабаб аёл 2019 йилда уйни ташлаб чиқиб кетган. 2021 йилда эса яна ҳомиладор бўлиб қолган ва туғилажак фарзандини сотиш йўлларини қидирган.
Суд мажлисида айбланувчи Жиноят кодексининг 135-модда (одам савдоси) 3-қисми билан айбдор дея топилган ва унга 5 йил озодликдан маҳрум этиш жазоси тайинланган.
Т.нинг турмуш ўртоғи чақалоқ унинг фарзанди бўлмагани сабаб уни олиб кетишдан бош тортган ва у болалар уйига жойлаштирилган.
Аввалроқ Сирдарёда беш кунлик чақалоғини 5 минг долларга сотаётган она қўлга олингани, Тошкентда уч кунлик чақалоғини 9 минг долларга сотишга уринган аёлга суд ҳукми ўқилгани тўғрисида хабар берилганди.
Изоҳ (0)