Маълумотлар мониторинги бўйича мустақил қўмита коронавирусга қарши ZF-UZ-VAC2001 вакцинаси билан 3 ёшдан катта бўлган болаларда ҳам эмлашни маъқуллади. Бу ҳақда Telegram’даги «Вакцина.uz» канали хабар берди.
Маълум қилинишича, Хитой–Ўзбекистон ҳамкорлигида яратилган ZF-UZ-VAC2001 вакцинасини 3-5, 6-11 ва 12-17 ёшдаги болаларда қўллаш хавфсизлиги DSMB (Data Safety Monitoring Board) – Маълумотлар мониторинги бўйича мустақил қўмита томонидан тасдиқланган.
DSMB – мустақил экспертлар гуруҳи бўлиб, улар тадқиқотлар натижаларига кўра тадқиқотда иштирок этганларнинг хавфсизлигини таҳлил қилади ва баҳолайди.
Ҳозирда Хитойда 12-17 ёшли бир гуруҳ болалар ZF-UZ-VAC2001 вакцинасининг 3 та дозаси, 6-11 ва 3-5 ёшли болалар гуруҳлари эса вакцинанинг биринчи дозаси билан эмланган. Таъкидланишича, болаларнинг саломатлигида ножўя таъсирлар кузатилмаган.
Аввалроқ Ўзбекистонда 12 ёшдан катта болаларни ҳам коронавирусга қарши Pfizer вакцинаси билан ихтиёрий равишда эмлашга рухсат берилганди.
Мавзуга доир: Соғлиқни сақлаш вазирлиги Тошкентда номаълум юқумли касаллик тарқалаётгани ҳақидаги видеомурожаат юзасидан изоҳ берди
Изоҳ (0)